बुटवल – नेत्रविक्रम चन्द ‘विप्लव’ नेतृत्वको नेकपालाई सरकारले प्रतिबन्ध लगाएको छ तर चन्दका छोरा प्रकाश महासचिव रहेको अखिल नेपाल जनस्वास्थ्यकर्मी महासंघको प्राविधिक सहयोगमा कपिलवस्तुको शिवराज नगरपालिका–३ शिवगढीमा निःशुल्क स्वास्थ्य शिविर सञ्चालन भएको छ ।

शिविरमा विप्लवका छोरा प्रकाशले आफैं आएर बिरामीको चेकजाँच गरे । शुक्रवार र शनिवार चलेको शिविरमा २ हजार ६ सय जनाले सेवा लिएका थिए । 

शहीद स्मृति प्रतिष्ठान नेपाल शिवराज कपिलवस्तुको आयोजनामा शिविर राखिएको थियो । चितवन मेडिकल कलेजका चिकित्साशास्त्र संकायमा अध्ययनरत चन्दले अहिले हाडजोर्नीमा इन्टर्न गरिरहेका छन् ।

कपिलवस्तुस्थित शिवगढी–३ भगवानपुरको नेपाल राष्ट्रिय आधारभूत विद्यालयको प्राङ्गणमा सयौंको संख्यामा सर्वसाधारण उपस्थित थिए । 

राज्यको उपस्थिति कम रहेको ठाउँमा स्वास्थ शिविरको सञ्चालन गरेर जनतालाई थोरै भएपनि राहत महसूस गराउन खोजेको प्रकाशले बताए । शिविरमा प्रहरीको पनि उपस्थिति रहेको थियो ।

स्वास्थ शिविरमा गाइनो, बालरोग, हाडजोर्नी, छाला तथा यौनरोग, नाक, कान तथा घाँटी, प्रयोगशाला लगायतका विभागबाट बिरामी जाँच गरिएको थियो । उपस्थित बिरामीले स्वास्थ शिविर अझ लम्ब्याउने अनुरोध समेत गरे । 

सोमवार शिविरको शिवगढीमै बसेर समीक्षा गरेका छन् । शिविरको लागि औषधि जनस्वास्थ्यकर्मी महासंघले व्यवस्थापन गरेको थियो भने डाक्टर, नर्स, सीएमए, ल्याब सहायक लगायत विभिन्न रोग विशेषज्ञसहित ४० जनाको स्वास्थ विज्ञ समूहले शिविरमा चेकजाँच गरेका थिए ।

कार्यक्रमको सहजीकरण नेपाल कम्युनिस्ट पार्टी कपिलवस्तु, अखिल क्रान्तिकारी लगायतले गरेका थियो ।