वैदेशिक रोजगारीमा ठगी : डेढ महिनामै ८३ जनाबाट ठगियो साढे ६ करोड

असार ९, २०७६

काठमाडौं – विभिन्न देशमा रोजगारीका लागि भिसा लगाइदिने नाममा डेढ महिनामा ८३ जना व्यक्तिको ६ करोड ५१ लाख ६६ हजार रुपैयाँ ठगिएको उजुरी परेको छ ।

वैदेशिक रोजगारीका क्रममा ठगी भएको भन्दै पीडितले वैदेशिक रोजगारी विभाग बुद्धनगरमा उजुरी गरेका छन् ।


ADVERTISEMENT

दक्षिण कोरिया, अमेरिका, क्यानडा, जापान, माल्टा लगायतका देशमा कामको लागि लैजाने भन्दै विभिन्न व्यक्तिमार्फत ठगिएको उजुरी विभागमा परेका छन् ।

दक्षिण कोरिया कामदार लैजान सरकारीस्तरमा छुट्टै ईपीएस प्रणाली छ तर वैशाख १ गतेदेखि जेठ १५ गतेसम्म दक्षिण कोरिया कामको लागि लैजाने नाममा ५ जना व्यक्ति ठगिएका छन् । पीडित व्यक्तिले आफूहरूले २८ लाख ५० हजार रुपैयाँ गुमाएकाले क्षतिपूर्ति दिलाइदिन विभागमा उजुरी दिएका छन् ।

अमेरिका र जापान लैजाने आश्वासनमा ठगले मोटो रकम लिने गरेको भन्दै विभागमा पीडितले निवेदन दिएका छन् । अमेरिका जान एकै व्यक्तिले ८० लाख रुपैयाँसम्म बुझाएको उजुरीमा उल्लेख छ ।

ठगिएका व्यक्ति सोझै अदालत समेत जाने गरेका छन् । जुन तथ्यांक रोजगार विभागसँग छैन । ‘चालू आर्थिक वर्षमा मात्रै हालसम्म ६ सय ५७ जना व्यक्ति वैदेशिक रोजगारीमा लैजाने नाममा ठगिएको उजुरी परेको छ,’ विभागका निर्देशक भोलानाथ गुरागाईंले भने ।

दर्ता भएका उजुरीमध्ये १ सय २२ वटा उजुरी विभागले वैदेशिक रोजगार न्यायाधीकरणमा दर्ता गरेको छ भने ६९ वटा उजुरीको फरफारक गरेको छ । ‘संस्थागत रुपमा ठगिएको भन्ने निवेदनमाथि विभागले नै कारवाही गर्छ तर व्यक्तिमार्फत ठगिएको उजुरीलाई विभागले अनिवार्य प्रमाणको आधारमा दर्ता गर्ने र अनुसन्धान तथा मुद्दा शाखाका अधिकारीमार्फत वैदेशिक रोजगार न्यायाधीकरणको कार्यालयमा मुद्दा दर्ता गर्ने गरेको छ,’ निर्देशक गुरागाईंले भने । 

सरकारले म्यानपावरमार्फत कामको लागि जानसक्ने भन्दै १ सय ७२ वटा देशका लागि स्वीकृति दिएको छ ।

असार ९, २०७६ मा प्रकाशित

नारायण अर्याल

पत्रकार अर्याल लोकान्तरका लागि समसामयिक घटनाक्रम र प्रशासनिक मामिलामा रिपोर्टिङ गर्छन् ।

लेखकबाट थप...

प्रतिक्रिया दिनुहोस