पाल्पा – युवालाई सहुलियत दरमा ऋण उपलब्ध गराएर गाउँमै उद्यमी बनाउन पाल्पाको माथागढी गाउँपालिकामा रोजगार श्रमिक बैंक स्थापना हुने भएको छ । 

गाउँपालिकाले युवालाई लक्षित गरी पाँचौं गाउँसभाबाट आर्थिक वर्षको नीति, कार्यक्रम तथा बजेट प्रस्तुतीकरणमा रोजगार श्रमिक बैंक स्थापना गर्ने लक्ष्य लिएको हो ।

श्रमिक बैंकबाट युवाहरुले गाउँमै उद्यमी तथा रोजगारीका लागि सहुलियत दरमा ऋण तथा सहयोग पाउनेछन् । 

गाउँमै बसेर व्यवसाय तथा उद्यम गर्न चाहने युवालाई सहुलियत दरमा ऋण प्रवाह गर्ने गरी गाउँपालिकाले रोजगार श्रमिक बैंक स्थापना गर्न लागेको अध्यक्ष सन्तोष थापा मगरले बताए । ‘गाउँपालिकाभित्र करीब १ हजार युवालाई सीटीईभीटीबाट तालिम दिई दक्ष जनशक्ति उत्पादन गर्ने र उत्पादित जनशक्तिलाई गाउँपालिकाभित्रै पूर्वाधार निर्माणमा परिचालन गर्ने गरी अगाडि बढेका छौं,’ उनले भने ।

अहिलेको प्रविधि तथा गुणस्तरलाई ध्यान दिँदै नक्सा पास, घर निर्माणका लागि स्थानीय ५ सय जना व्यक्तिलाई सिटिइभिटीबाट प्राविधिक तालीम दिई गाउँगाउँमा भूकम्प प्रतिरोधी नमूना घर निर्माण गर्ने गरी नीति तथा कार्यक्रम बनाएको अध्यक्ष थापाले बताए ।

गाउँको रकम गाउँमै खर्च गरेर व्यक्तिलाई बीमासहितको रोजगार दिने गाउँपालिकाको लक्ष्य छ । शिक्षा, स्वास्थ्य र आर्थिक क्षेत्रमा गाउँपालिकालाई नमूना बनाउने गरी योजनाका साथ अगाडि बढेको बताइएको छ ।

मगर समुदायको बाहुल्यता रहेको यस गाउँपालिकालाई नमूना गाउँपालिका बनाउने अभियानका साथ सबै स्वास्थ्य चौकीमा प्रयोगशाला सेवा, निःशुल्क औषधि उपचार र बर्थिङ सेन्टर सञ्चालन गर्ने जनाएको छ । गाउँपालिकाले घरमै सुत्केरी हुने दरलाई शून्यमा परिणत गराउन अभियानकै रुपमा विभिन्न कार्यक्रम गरिरहेको छ ।

स्थानीयको आयस्तर वृद्धि गराउन कृषिजन्य सामग्री, उन्नत जातका बीउबिजन वितरण कार्यलाई निरन्तर रुपमा अगाडि बढाउँदै जाने गाउँपालिकाले जनाएको छ ।