इजिप्ट अफ्रिकी कपको प्रिक्वार्टरफाइनलबाटै बाहिरिएपछि रोनाल्डोले बालून दोर जित्ने सम्भावना प्रबल

असार २३, २०७६

काठमाडौं – अफ्रिका कप अफ नेसन्सबाट आयोजक राष्ट्र इजिप्ट प्रिक्वार्टरफाइनलमा दक्षिण अफ्रिकासँग हारेपछि मोहम्मद सलाहले बालून दोर जित्ने सम्भावना क्षीण बनेर गएको छ । 

थेमबिनकोसी लोर्चले अन्तिमतिर गरेको गोलले कायरोमा दक्षिण अफ्रिका विजयी भएर क्वार्टरफाइनलमा पुग्यो । यो प्रतियोगिता सलाहको नेतृत्वमा इजिप्टले जित्ने धेरैले अनुमान गरेका थिए । 


ADVERTISEMENT

तर इजिप्ट प्रतियोगिताबाट छिट्टै बाहिरिएपछि व्यवस्थापक हाभिएर अगिरलाई बर्खास्त गरिएको छ । 

अगिरले नै दक्षिण अफ्रिकासँगको भिडन्तअघि इजिप्टका स्टार खेलाडी सलाहले इज्प्टिलाई जिताएर बालून दोरमा दाबी मजबूत गर्ने बताएका थिए । 

सलाहले आफ्नो क्लब लिभरपूललाई च्याम्पियन्स लीग ट्रफी जिताएपछि घरमा आएर इजिप्टलाई अफ्रिकी कप जिताउन चाहेका थिए । 

यस वर्षको बालून दोरका लागि सलाह, उनका क्लबका साथी तथा नेदरल्यान्ड्सका कप्तान भर्जिल भ्यान डाइक, लियोनेल मेस्सी र क्रिस्टियानो रोनाल्डो अग्रपंक्तिमा छन् । 

तर रोनाल्डोले युभेन्टसलाई अनि मेस्सीले बार्सिलोनालाई च्याम्पियन्स लीगको फाइनलमा पुर्‍याउन नसकेपछि राष्ट्रिय टोलीलाई दिलाएको ट्रफीका आधारमा कुनै खेलाडीले बालून दोर जित्ने सम्भावना रहेको संकेत धेरैले दिएका छन् । 

अर्जेन्टिनालाई मेस्सीले कोपा अमेरिकाको फाइनलमा पुर्‍याउन नसकी तेस्रो स्थानमा चित्त बुझाउनुपरेको थियो । तेस्रो स्थानका लागि भएको खेलमा पनि उनले विवादास्पद रूपमा रातो कार्ड पाएका थिए । 

उनका चिर प्रतिस्पर्धी रोनाल्डोले चाहिँ आफ्नो देशलाई यूईएफए नेसन्स लीगको उपाधि दिलाएका थिए । फाइनलमा पोर्चुगलले नेदरल्यान्ड्सलाई हराएको थियो । 

रोनाल्डोले सेमीफाइनलमा स्विट्जरल्यान्डविरुद्ध ह्याटट्रिक हानेका थिए । 

युभेन्टसका नयाँ प्रशिक्षक माउरिजियो सार्रीले रोनाल्डोलाई अर्को सीजनमा थप खतरनाक बनाउने रणनीति अपनाउने बताएपछि विपक्षी टीमहरूको होश उडेको छ । 

अघिल्लो सीजनमा रोनाल्डोले युभेन्टसका लागि सबै प्रतियोगितामा गरी २८ गोल हानेका थिए । उनका प्रतिस्पर्धी मेस्सीले भने बार्सिलोनाका लागि ५१ गोल हानेका थिए । 

सलाहले लिभरपूलका लागि २७ गोल गरे तर इजिप्टलाई फाइनलमा पुर्‍याएको भए उनले बालून दोर जित्ने प्रबल सम्भावना हुन्थ्यो । पोहोर साल लुका मोड्रिचले आफ्नो क्लब रियाल मड्रिडलाई च्याम्पियन्स लीग जिताएर अनि देश क्रोएसियालाई विश्वकपको फाइनलमा पुर्‍याएर बालून दोर जितेका थिए । 

बालून दोरका अन्य प्रतिस्पर्धीमा लिभरपूलका सादियो माने र एलिसन बेकर पनि छन् ।

क्लबको सीजन शुरू भएपछि खेलाडीहरूले गर्ने प्रदर्शनले पनि बालून दोरको विजेता सुनिश्चित गर्नेछ । 

तर अन्तर्राष्ट्रिय फूटबल उपाधि जितेकाले रोनाल्डोले नै बालून दोर जित्ने प्रबल सम्भावना छ । उनले उपाधि जिते भने प्रतिस्पर्धी मेस्सीभन्दा एक उपाधि बढी हुनेछ ।

आरटीबाट
 

असार २३, २०७६ मा प्रकाशित

प्रतिक्रिया दिनुहोस