अण्डाको मूल्य बढ्यो, लागत मूल्य अझै पुगेन

प्रतिकात्मक तस्वीर
असार २४, २०७६

चितवन – कुखुराको अण्डाको मूल्यमा सुधार आएको छ । लागत मूल्य भने कृषकले अझै पाउन सकेका छैनन् ।

प्रतिक्रेट २ सय रुपैयाँमा बिक्री हुँदै आएको ठूलो अण्डाको मूल्य २ सय ८० रुपैयाँ पुगेको छ । सानो अण्डाको मूल्य १ सय १५ रुपैयाँबाट बढेर २ सय ३० रुपैयाँ पुगेको छ ।


ADVERTISEMENT

नेपाल अण्डा उत्पादक संघका केन्द्रीय अध्यक्ष त्रिलोचन कँडेलका अनुसार कृषकको लागत मूल्य प्रतिगोटा १० रुपैयाँ पर्दछ । बढेको बिक्रीमूल्य समग्रमा प्रतिगोटा आठ रुपैयाँ ५० पैसा पर्दछ । हाल दैनिक ४० लाख हाराहारी अण्डा उत्पादन हुने गर्दछ । यो संख्या ५५ लाख पुगेकोमा क्रमशः घट्दै आएको कँडेलको भनाइ छ ।

अण्डाको मूल्य कम भएपछि धेरैले माउ कुखुरा बिक्री गरेका छन् । यससँगै चर्को गर्मीका कारण उत्पादनमा कमी आएको छ ।

पछिल्लो समय कृषकले चल्ला राख्नसमेत छाडेका थिए । यसबाट अण्डा उत्पादनमा क्रमशः गिरावट हुँदै जाने अनुमान गरिएको छ । संघका केन्द्रीय सचिव मदन पोखरेलले अण्डाको मागअनुसार आपूर्ति हुन कठिन भएकाले क्रमशः मूल्यवृद्धि हुँदै जाने अनुमान गरिएको बताए । ३ वर्षअघि अण्डाको मूल्य बढेर प्रतिक्रेट ३ सय ६० रुपैयाँ पुगेको थियो । गत १ वर्षयता भने खर्च नधान्ने गरी मूल्यमा गिरावट आएको कृषकको भनाइ छ ।

पोख्रेलका अनुसार नेपालमा ७ हजार कृषकले कुखुरा पाल्ने गरेको तथ्यांक छ । जहाँ १ लाख ५० हजारभन्दा बढीले प्रत्यक्ष रोजगारी पाएका छन् । लेयर्स कुखुरामा मात्र १ अर्ब रुपैयाँभन्दा बढी लगानी भएको पोखरेलको भनाइ छ ।

दानाको मूल्य र बैंकको ब्याज बढ्दै जाने र अण्डाको मूल्य घट्दै जाँदा व्यवसायी विस्थापित हुने अवस्थामा पुगेकोमा क्रमशः मूल्यवृद्धि हुन सकेमा टिक्नसक्ने उनले बताए ।

असार २४, २०७६ मा प्रकाशित

प्रतिक्रिया दिनुहोस