प्रचण्डको सचिवालयले भन्यो– श्यामशरणलाई भेटेको छैन, विषादी प्रकरणमा कुप्रचार गरियो

असार २७, २०७६

काठमाडौं – नेकपा अध्यक्ष एवं पूर्वप्रधानमन्त्री पुष्पकमल दाहाल प्रचण्डको सचिवालयले भारतीय पूर्व राजदूत श्यामशरणसँग गोप्य भेटवार्ता भएको भन्ने समाचारको खण्डन गरेको छ ।

सचिवालय सदस्य समेत रहेकी प्रचण्डपूत्री गंगा दाहालले फेसबूकमा स्टाटस लेख्दै कुनै पनि भारतीय व्यक्ति वा निकायसँग हालसालै कुनै प्रकारको गोप्य भेटवार्ता नभएको जिकिर गरेकी छन् ।


ADVERTISEMENT

उनले तरकारीमा विषादी परीक्षण प्रकरणमा प्रचण्डको भूमिकासम्बन्धमा आएका समाचारको पनि खण्डन गरेकी छन् ।

पूर्वमाओवादी खेमाका मन्त्रीहरूले नेतृत्व गरेका कृषि र उद्योग वाणिज्य मन्त्रालयको नेतृत्व र पहलमा शुरू भएको विषादी परीक्षणको निर्णयबाट सरकार पछि हटेको थियो ।

तयारी नपुग्दै विषादी परीक्षण शुरू हुनुमा प्रचण्डको भूमिका रहेको आसयका समाचार आएका थिए ।

यद्यपि विषादी परीक्षण नगर्ने निर्णय तत्काल कार्यान्वयन नगर्न सर्वोच्चले अन्तरिम आदेश दिएपछि भारतबाट आउने तरकारी तथा फलफूलहरू सीमा नाकामा रोकिएका छन् ।

हेर्नुहोस्, गंगा दाहालको स्टाटस :

नेकपा अध्यक्ष तथा पूर्व प्रम क. प्रचण्डले हालै नेपालका लागि एक पूर्व भारतीय राजदूत श्यामशरणसँग गोप्य भेटघाट गरेको भन्ने समाचारप्रति हाम्रो गम्भीर ध्यानाकर्षण भएको छ । कमरेड प्रचण्डका कुनै पनि कूटनीतिक भेटघाटहरू गोप्य र रहस्यमय छैनन्, बरू ती पारदर्शी एवं पार्टी तथा सरकारी निकायहरूसँगको समन्वयमै भैरहेका छन् । हालसालै कुनै भारतीय व्यक्ति वा निकायसँग वहाँको त्यस प्रकारको गोप्य भेट भएको छैन । तसर्थ, त्यससँग जोडेर गरिएका प्रचारबाजीहरू असत्य, नियोजित र दुराषययुक्त छन् ।

त्यस्तै तरकारीको विषादी परीक्षण प्रकरणमा अध्यक्ष प्रचण्डलाई जबर्जस्ती जोडेर गरिएको कुप्रचार भर्त्सनायोग्य छ । मुलुक र जनताको हितका लागि नेपाल सरकारद्वारा गरिएको र गरिनुपर्ने यस कामबारे अध्यक्ष प्रचण्ड सचेत र स्पष्ट हुनुहुन्छ । नेपालको रूपान्तरणका लागि ठूलो ऐतिहासिक भूमिका खेलेको नेपाली पत्रकार जगतबाट निरन्तर सत्यतथ्य समाचार मात्र आउने कुरामा हामी विश्वास व्यक्त गर्दछौं । धन्यवाद !

असार २७, २०७६ मा प्रकाशित

प्रतिक्रिया दिनुहोस