काठमाडौं– आर्थिक वर्ष सकिनै लाग्दा सरकारले बजेट खर्च तीव्र रूपमा बढाएको छ । अघिल्लो शनिवार ९ खर्ब २१ अर्ब  ७ करोड ९७ लाख रुपैयाँ बजेट खर्च गरेको सरकारले गत शनिवारसम्म १० खर्ब १६ अर्ब ३३ करोड ४४ लाख रुपैयाँ खर्च भएको छ ।

महालेखा नियन्त्रक कार्यालयका अनुसार आर्थिक वर्ष सकिन लागेसँगै सरकारले शनिवार पनि खर्च गर्न थालेको छ । कार्यालयका अनुसार शनिवार मात्रै २ अर्ब ८६ करोड ६९ लाख रुपैयाँ निकासा गरिएको छ ।

यसअघि शुक्रवार कल खर्च १० खर्ब १३ अर्ब ४६ करोड ७६ लाख रुपैयाँ खर्च गरिएको थियो । शनिवारको निकासापछि सरकारको कुल खर्च १० खर्ब १६ अर्ब ३३ करोड ४४ लाख रुपैयाँ पुगेको महालेखा परीक्षकको कार्यालयले जानकारी दिएको छ । यो खर्च कुल बजेटको ७७ दशमलव २८ प्रतिशत हो ।

चालु आर्थिक वर्षमा सरकारले चालुगत, पुँजीगत र वित्तीय व्यवस्थातर्फ गरी कुल १३ खर्ब १५ अर्ब १६करोड १७ लाख रुपैयाँको बजेट ल्याएको थियो ।

शनिवारसम्मको तथ्याङ्क अनुसार पुँजीगत (विकास) खर्च ६३ दशमलव ५० प्रतिशत पुगेको छ । कुल ३ खर्ब १४ अर्ब ९९ करोड ८२ लाख रुपैयाँ बजेट मध्ये शनिवारसम्म  २ खर्ब ९४ करोड ३७ लाख रुपैयाँ खर्च भएको महालेखा नियन्त्रक कार्यालयको तथ्याङ्क छ ।

त्यस्तै चालगततर्फ शनिवारसम्मको खर्च ८२ प्रतिशत र वित्तीय व्यवस्थातर्फ ७८ प्रतिशत खर्च भएको महालेखा नियन्त्रक कार्यालयको तथ्याङ्क छ ।