साताको शेयर : दुई अर्बको कारोबार

फाइल फोटो
साउन ४, २०७६

काठमाडौं- धितोपत्र बजारमा यस साता कूल १७० कम्पनीको करीब दुई अर्ब रुपैयाँ बराबरको शेयर कारोवार भयो ।

आर्थिक वर्ष २०७५/०७६ को अन्तिम तीन दिन र चालू आर्थिक वर्षको दुई दिन खुलेको बजारमा कूल ८५ लाख ९९ हजार १७ कित्ता शेयर कारोबार भए । नेपाल स्टक एक्सचेञ्जका अनुसार चालू आर्थिक वर्ष शुरू भएपछिको दुई दिन कारोवार मापक नेप्से उतारचढावपूर्ण अवस्थामा रह्यो । 


ADVERTISEMENT

 अघिल्लो साता अर्थात् असार २६ गते बिहीवार एक हजार २४८ दशमलव ५३ मा पुगेर बन्द भएको कारोबार यस साताको पहिलो दिन अर्थात् आइतवार झिनो अंकले सुधार भयो ।  नेपाल स्टक एक्सचेञ्जका अनुसार कारोबार मापक नेप्से परिसूचक ०.९५ बिन्दुले बढेर एक हजार २४९.४९ बिन्दुमा पुग्यो । 

सो दिन नेप्से सामान्य अङ्कले बढे पनि कारोवार रकम भने औसत मात्रै रह्यो । कूल १६१ कम्पनीको १० लाख ४२ हजार ६४६ कित्ता शेयर २८ करोड ५२ लाख १४ हजार ५७२ मूल्यमा खरीद बिक्री भए । 

सोमवार भने करीब ४३ करोडको कारोबार भयो । कूल २९ लाख ७३ हजार ८४३ कित्ता शेयर बिक्री हुँदा दोस्रो बजारमा त्यस दिन १७० कम्पनीको शेयर कारोबार भयो । मंगलबार पनि कूल ३४ करोडको कारोबार हुँदा १६१ कम्पनीको १९ लाख ५६ हजार ६३० कित्ता शेयर खरीद बिक्री भए । 

यस्तै बुधवार कारोबार मापक नेप्से परिसूचक लगानीकर्तालाई उत्साहित बनाउँदै दोहोरो अंकले वृद्धि भयो । सो दिन नेप्से परिसूचक १५.८५ अंकले बढेर एक हजार २४७.८६ मा पुग्यो । नेप्से परिसूचक दोहोरो अंकले बढे पनि कारोबार रकम भने औसतमै सीमित रह्यो । कूल १६७ कम्पनीका १३ लाख ७५ हजार १९० कित्ता शेयर ४२ करोड ६७ लाख ४३ हजार ४५८ मूल्यमा कारोबार भए । 

त्यस्तै बुधवार दोहोरो अंकले उकालो लागेर बन्द भएको बजारमा बिहीवार भने नेप्से परिसूचक २.३७ बिन्दुले घटेर एक हजार २७२.४९ बिन्दुमा पुग्यो । नेप्से ओरालो लागे पनि कारोबार रकम भने औसतमा रह्यो । कूल १५८ कम्पनीको १२ लाख ५० हजार ७०८ कित्ता शेयर ४१ करोड १३ लाख ६९ हजार २९९ रुपैयाँमा खरीद बिक्री भए । 

बजार पूँजीकरणका आधारमा यस साता पनि वाणिज्य बैंककै बोलवाला रह्यो । पहिलो नम्बरमा नेपाल दूरसञ्चार कम्पनी कायम रहँदा नविल बैंक, नेपाल इन्भेस्टमेन्ट बैंक, स्ट्यार्डड चार्टड बैंक, एभरेष्ट बैंक, नेपाल लाइफ इन्स्योरेन्स, हिमालयन बैंक, एनआईसी एशिया बैंक, नेपाल एसबीआई बैंक र कृषि विकास बैंक उत्कृष्ट दशौं स्थानमा परे । 

यस्तै यस साता विभिन्न चार कम्पनीका शेयर स्टकमा सूचीकृत भए । त्यसमा एशियन लाइफ इन्स्योरेन्स कम्पनीको ७५ लाख ४० हजार ३५२ कित्ता हकप्रद शेयर, एनएमबी लघुवित्त वित्तीय संस्थाको दुई लाख ११ हजार ३१२ कित्ता हकप्रद शेयर, नविल ब्यालेन्स फण्डको ११ करोड २० लाख एकाइ साधारण शेयर र कुमारी बैंकको कूल एक करोड ५२ लाख २१ हजार ७८१ कित्ता शेयर लाभांश सूचीकृत भएका छन् ।  

साउन ४, २०७६ मा प्रकाशित

प्रतिक्रिया दिनुहोस