काभ्रे- आर्थिक वर्ष २०७५/०७६ मा न्यून बजेटका कारण असार मसान्तसम्ममा सक्नुपर्ने काभ्रेपलाञ्चोक र सिन्धुपाल्चोक जिल्लाका १४० वटा खानेपानी आयोजनाको काम रोकिएका छन् । 

न्यून बजेटले क्रमागत आयोजनाअन्तर्गत २०७३ सालमा शुरु गरी २०७६ असार मसान्तसम्ममा सक्नुपर्ने काभ्रेपलाञ्चोकको ७५ वटा र सिन्धुपाल्चोकको ६५ वटा खानेपानी आयोजनाको काम सम्पन्न गर्न नसकिएको खानेपानी तथा सरसफाइ डिभिजन कार्यालय चौताराका प्रमुख लोकबहादुर चौलागाईंले जानकारी दिए । उनले भने, 'पाँच करोड रुपैयाँको आयोजनामा जम्मा दुई लाख बजेट आउँछ, गत असार मसान्तसम्ममा सक्नुपर्ने दुवै जिल्लाका चालू खानेपानी आयोजना त्यतिकै अलपत्र अवस्थामा छन् ।' 

चौलागाईंले गत आवमा न्यून बजेट आउँदा संघीय मन्त्रालयमा थप बजेटका लागि गत वैशाखसम्म ताकेता गर्दा पनि थप बजेट निकासा नभएको बताए । 'दुई वटै जिल्लाका केही योजना सम्पन्न हुने चरणमा थिए, थोरै रकमले पनि रोकिएका छन्,' उनले भने । उनले न्यून बजेट निकासा हुनु र कर्मचारी समायोजन तथा डिभिजन कार्यालय स्थानान्तरणका कारण आयोजनाका काम प्रभावित भएको बताए ।

मुलुक संघीयतामा गएपछि २०७५ साउन महीनामा काभ्रेपलाञ्चोकको धुलिखेलमा रहेको खानेपानी तथा सरसफाइ डिभिजन कार्यालय सिन्धुपाल्चोकको चौतारामा सारिएको थियो । त्यस कार्यालयको कार्यक्षेत्र अहिले दुवै जिल्लामा रहेको छ । 

पुनःनिर्माण योजनाअन्तर्गत शुरु गरिएका काभ्रेपलाञ्चोक जिल्लाका अधिकांश खानेपानी आयोजना पनि थप बजेट नआउँदा अलपत्र अवस्थामा रहेका छन् । केन्द्रीय सरकारको पुनःनिर्माण शीर्षकको बजेटबाट २०७३ सालदेखि विभिन्न मितिमा शुरु गरिएका ९० वटामध्ये हाल करीब दुई दर्जन खानेपानी आयोजना सम्पन्न भएका छन् ।