स्याङ्जा-नेपाली कांग्रेसका नेता डा. शेखर कोइरालाले सरकारको खोक्रो राष्ट्रवादले देशको सार्वभौमिकता र राष्ट्रियतामाथि खतरा बढेको आरोप लगाएका छन् ।

सोमवार ३७ औं बिपी स्मृति दिवसको अवसरमा स्याङ्जाको वालिङमा आयोजित कार्यक्रममा नेता डा. कोइरालाले सरकारका हरेक गतिविधिले अन्तर्राष्ट्रिय स्तरमा देशको छवि धमिलिँदै गएको दाबी गरेका हुन् ।

उनले प्रश्न गरे, 'हाम्रो कूनै सम्बन्ध नरहेको भेनेजुयलाका राष्ट्रपतिका छोरा र मन्त्रीहरूलाई बोलाएर कम्युनिष्ट नेताहरूले के गर्न खोजेको ? किन बोलाइयो उनलाई ? यसले नेपालको छवि कहाँ पुग्छ ? अन्तर्राष्ट्रिय स्तरमा के सन्देश जान्छ ?' यो घटनाले नेपालप्रति अमेरिका सशंकित भएको उनको भनाइ थियो । 

डा. कोइरालाले लोकतन्त्रका आधारभूत मान्यतालाई समेत कुल्चँदै सरकारले ल्याएका विधेयकहरूले लोकतन्त्र गुम्ने आशंका पैदा भएको बताए । उनले समृद्धिका नाममा सरकारले हावादारी सपना बाँडेर जनतालाई झुटको जालोमा पारेको टिप्पणी गरे । 

कोइरालाले पार्टी कब्जा गर्ने र व्यक्तिगत स्वतन्त्रतामाथि नै बन्देज लगाउने उद्देश्यले ल्याइएको कांग्रेस पार्टीको नियमावलीले कम्युनिष्ट पार्टीको झझल्को दिएको बताए । कांग्रेस पार्टी गरीबको पनि पार्टी हो भन्ने कुरा बिर्सेर अव्यवहारिक ढंगले लेबी सिष्टम ल्याइएकोप्रति आक्रोशित हुँदै भने, 'गरीब व्यक्ति अब कांग्रेस बन्न नपाउने हो ?'

 कार्यक्रममा कांग्रेस केन्द्रीय सदस्य डा. चन्द्र भण्डारीले कार्यकर्ताले जति भन्दा पनि शीर्ष नेताहरू नसच्चिएकाले अब महाधिवेशनमार्फत उनीहरूलाई बिदा गर्नुपर्ने बताए । 

अर्का केन्द्रीय सदस्य धनराज गुरुङले जनता र कार्यकर्ताको भावना अनुसार पार्टी सञ्चालन नभएकै कारण अहिलेको अवस्था आएको बताए । गुरुङले धनवाद र डनवादले अब पार्टी नचल्ने धारणा राखे ।