काठमाडौं– बिजुली र पेट्रोल दुवैबाट चल्ने स्मार्ट हाइब्रिड गाडीको नेपालमा बिक्री शुरू भएको छ । हाइब्रिड कार त्यस्तो कार हो जसमा इलेक्ट्रिक मोटर तथा पेट्रोल वा डिजेलले सञ्चालित हुने इन्जिन जडान गरिएको हुन्छ । यस्ता कारहरूमा अधिकांश समय इलेक्ट्रिक मोटरले काम गर्दछ भने बाटोको अवस्था हेरी इन्जिनले पनि कार्य गर्दछ । यस्तो कारमा इन्धनको खपत कम हुन्छ । अर्थात् कहिले ब्याट्रीको मात्र खपत हुन्छ भने कहिले ब्याट्रीको साथसाथै इन्धनको पनि खपत हुने गर्दछ । ब्याट्रीले मात्र इन्जिनमा शक्ति पुर्‍याउन नसकेको अवस्थामा इन्धन इन्जिनले सहयोग गर्दछ । 

हाइब्रिड कार पनि अन्य कार जत्तिकै चलाउन सहज हुन्छ । पछिल्लो समय यो कार संसारकै प्रमुख रोजाइमा पर्दै आएको छ ।  हाइब्रिड कारमा चालकले आफ्नो आवश्यकता वा बाटोको प्रकृति हेरी कारलाई कुन मोडमा चलाउनु पर्ने हो सो कुरा आफैं तय गर्न सकिन्छ । 

हाइब्रिड कारमा रहेको इलेक्ट्रिक मोटर ब्याट्रीमा जोडिएको हुन्छ । जसले गर्दा हाइब्रिड प्रविधिबाट इन्जिनको क्षमता बढाउन सकिन्छ । साधारण कारमा जब ब्रेक लगाइन्छ त्यस अवस्थामा काइनेटिक इनर्जी खेर जान्छ तर हाइब्रिड प्रविधियुक्त कारमा जब ब्रेक लगाइन्छ त्यस अवस्थामा उत्पन्न भएको काइनेटिक इनर्जीले हाइब्रिड कारमा भएको ब्याट्री चार्ज हुन्छ । 

हाइब्रिड इन्जिनका विभिन्न प्रकारहरू हुने गर्दछन् तीमध्ये प्यारलल हाइब्रिड, प्लगइन हाइब्रिड, सिरिज हाइब्रिड, माइल्ड हाइब्रिड, स्मार्ट हाइब्रिड हाल प्रयोगमा आइरहेका छन् । 

हाइब्रिड कारका धेरै विशेषता छन्, जस्तो यसमा इन्धनमा हुने मूल्य वृद्धिले पनि अन्य कारलाई जस्तो असर गर्दैन । कार्बन उत्सर्जन पनि न्यून मात्रामा गर्ने हुँदा वातावरणमा पनि यसले ठूलो योगदान दिन्छ । प्रत्येक वर्ष विश्वको तापक्रम बढ्दै गइरहेको वर्तमान अवस्थमा यस्ता कारहरूले पर्यावरणीय सन्तुलनमा ठूलो योगदान पुर्‍याउने भएकोले आज विश्वका हजारौं वैज्ञानिकहरूले यस्ता कारहरूमा अझ बढी गहिरो अन्वेषण गर्दै आएका छन् । 

ब्रेक लगाउँदा उत्पन्न हुने काइनेटिक इनर्जीले ब्याट्री चार्ज हुने यसको अर्को विशेषता हो । त्यसैगरी यस्ता कारहरूको निर्माण गर्दा हलुका कच्चा सामग्रीहरूको प्रयोग गरिएको हुन्छ, अर्थात् हलुका भएका कारण यस्ता कारहरूले कम इन्धन खपत गर्दछन् । यस्ता कारहरूको दिनप्रतिदिन माग बढ्दै गइरहेको अवस्थामा माग ज्यादा भएको हुँदा उच्चतम मूल्यमा रिसेल गर्न पनि सहजै सकिन्छ । 

विश्वमा पेट्रोलियम पदार्थको स्रोत क्रमशः घट्दै गइरहेको वर्तमान अवस्थमा यस्ता कारहरुले निश्चय पनि इन्धन बचतमा ठूलो योगदान पुर्‍याउने विश्वास लिन सकिन्छ । त्यसैले विश्वमा यस्ता कारहरूको खरीदमा सरकारले समेत सहुलियत प्रदान गर्दै आएका छन् । नेपाल सरकारले यस्ता कारमा दिन लागेको सहुलियतले इन्धन खपत कम गर्ने कारप्रति नेपाली उपभोक्ताको आकर्षण बढ्ने अटोमोबिल्स क्षेत्रका जानकारहरू बताउँछन् ।