बुटवल- गुल्मीको सत्यवतीमा गएको पहिरोबाट ६ सय घरपरिवार विस्थापित भएका छन् । उनीहरूलाई सुरक्षित स्थानमा सारिएको छ ।

सत्यवती गाउँपालिका वडा नम्बर ३ ठूलो लुम्पेकको सिङदी गाउँ नै पहिरोको उच्च जोखिममा रहेकाले झण्डै चार सय जनालाई स्थानीय धर्मपुर मावि र अस्लेवाका सुरक्षित स्थानमा सारिएको हो । 

वडा नम्बर ४ को लिम्घामा दुई सय घरपरिवार जोखिममा रहेपछि स्थानीय सरस्वती माविमा स्थानान्तरण गरिएको गाउँपालिकाका उपाध्यक्ष शुवर्णा शेरचन शाहीले जानकारी दिइन् ।अहिले पनि पानी परिरहेका कारण लिम्घा र ठूलो लुम्पेक सडक पहिरोले अवरुद्ध हुँदा राहतका सामग्री त्यहाँ पुग्न सकेको छैन । 

मंगलवार परराष्ट्रमन्त्री प्रदीप ज्ञवाली पहिरो गएको स्थल पुगेका थिए । उनी आएको हेलिकप्टरले पोखराबाट राहत सामग्री ल्याउने तयारी भए पनि मौसम खराबीका कारण हेलिकप्टर आउन सकेको छैन । सदरमुकाम तम्घासबाट पठाएको राहत रुद्रवेणी र शाहघाटमा रोकिएको छ । गाउँमा खाद्यान्न जुटाएर विद्यालयमा मेस लगाएर विस्थापितलाई खाना खुवाइएको उपाध्यक्ष शाहीले लोकान्तरलाई जानकारी दिइन् ।  

दाहसंस्कार गर्न लैजान पनि सकिएन 

दाहसंस्कार गर्ने ठाउँ साहघाट पहिरो र पानी परिरहेका कारण शवहरूलाई त्यहाँ लैजाने सकिएको छैन । सामूहिक दाहसंस्कार गर्ने तयारी भएपनि पानी परिहेका कारण घाटमा शवहरू लैजान नसकिएको शाहीले बताइन् ।  

राहत अझै पुग्न सकेन 

'गाउँपालिकाले दिन दिने राहत पनि गाउँपालिकाको कार्यालयमै छ,'  शाहीले भनिन्, 'पहिरो गएका ठाउँमा ३ घण्टा पैदल हिँडनुपर्ने अवस्था छ । पहिरोको कारण गाडी जान नसक्ने अवस्था छ ।' 

पहिरोमा परि घाइते भएका धनी तरामु र करिस्मा तरामुलाई उपचारका लागि काठमाडौं लैजाने भनिए पनि पानी परिरहेका कारण लैजान सकिएको छैन । प्रमुख जिल्ला अधिकारी यदुनाथ पौडेले हलिकप्टर पोखरा रहेको र मौषम खराब भएका कारण आउन नसकेको बताए ।  

वेपत्ताको खोजी गर्न सेनाको टोली पुग्दै

पहिरामा परि अझै चार जना बेपत्ता भएका छन् । पहिरोमा ववी बिक, माया बिक, तारा बिक र सुमन बिक हराइरहेका छन् । प्रजिअ पौडेलले हराइरहेकालाई खोजीको लागि नेपाली सेनाको दुई टोली घटनास्थलतर्फ जाँदै गरेको जानकारी दिए । १५/१५ जनाको दुई टोली लिम्घा जाँदै गरेको उनले बताए ।