काठमाडौँ -इन्टरनेट सेवा प्रदायक कम्पनी 'आइटेल कम्युनिकेसन'ले अर्को इन्टरनेट सेवा प्रदायक संस्था 'स्पेस टाइम नेटवर्क'का कर्मचारीले आफ्नो तार काटेको आरोप लगाएको छ ।

स्पेस टाइमका एक कर्मचारी सुरज गोर्खाली बिहीवार साँझ करीब ५ बजेतिर सातदोबाटोमा इन्टरनेट सेवा प्रवाहका लागि राखिएको केवल काट्दै गरेको अवस्थामा रंगेहात भेटिएका थिए ।

आइटेलका कर्मचारीले गोर्खालीले आफ्नो केवल काट्दै गरेको देखेपछि सातदोबाटोस्थित महानगरीय प्रहरी वृत्तमा खबर गरेका थिए । दुवै संस्था इन्टरनेट र टेलीभिजन प्रदायक कम्पनी हुन् ।

गोर्खालीलाई रंगेहात समातेका आइटेलका एक कर्मचारीले भने, 'प्रतिस्पर्धा गर्न नसकेर भौतिक क्षति गराउने बाटोमा स्पेस टाइमले कर्मचारी खटाएरै हाम्रो भौतिक क्षति गराउँदै आएको छ । यसअघि पनि हामीमाथि भौतिक क्षति गराइने गरिएको थियो । तर आज रंगेहात समात्यौं ।'

सातदोबाटोस्थित प्रहरी वृत्तका डीएसपी गौतम मिश्रले यसबारेमा थप अनुसन्धान भइरहेको लोकान्तरलाई बताए ।

मिस्टेक भयो - स्पेस टाइम

स्पेसटाइमका प्रशासन प्रमुख श्याम बन्जाडे भने आफ्नो प्राविधिक कर्मचारीले गल्तीले अरु कसैको तार काटिन गएको बताउँछन् ।

लोकान्तरसँग कुरा गर्दै बन्जाडेले भने, 'प्राविधिक कर्मचारी हुन्, काम गर्ने सिलसिलामा गल्तीवश उनले अर्को केवल काटेछन् । हालसम्म अनुसन्धान भएको छैन । के कति क्षति पुगेको हो, त्यो अनुसन्धानपछि मात्र थाहा होला ।'

बन्जाडेले स्पेसटाइमको प्रगति देख्न नसकेका कारण सानो गल्तीमा पनि प्रहरी गुहारेर क्षतिपूर्तिको माग गरेको आरोप लगाए । 'सानो गल्तीमा यसरी प्रहरीमा आउनु भनेको उहाँहरूले हामीले गरेको प्रगति देख्न नसकेर हो जस्तो हामीलाई लागेको छ,' उनले भने, 'लाइन बिस्तार गर्ने क्रममा विद्युत प्राधिकरणले हाम्रा पनि तारहरू काटेको छ तर हामीले इस्यु बनाएका छैनौं ।'