बाटला हाउस फिल्म समीक्षा : आतंकवादका विषयमा बनेको बोल्ड फिल्म

साउन ३०, २०७६

काठमाडौं – बाटला हाउसमा भारतीय प्रहरी र आतंकवादीहरूका बीचमा भिडन्त भएको थियो । यो फिल्मले त्यसैले इन्काउन्टरलाई विषय बनाएको छ । 

लेखक रितेश शाह र निर्देशक निखिल आडवाणीले उक्त इन्काउन्टरलाई आफ्नो दृष्टिकोणमार्फत पेश गरेका छन् । फिल्मले प्रहरी र धर्मको नाममा हुने आतंकवादी क्रियाकलापका विषयमा आम मानिसमा रहेको धारणा पस्केको छ ।


ADVERTISEMENT

फिल्मका नायक सञ्जय कुमार (जोन अब्राहम) हुन् । उनकी पत्नी नन्दिता टीभी एंकर हुन् । इन्डियन मुजाहिद्दीनले भारतमा अपनाएको मोड्युललाई फिल्मको कथामा ढालिएको छ । बाटला हाउस इन्काउन्टरपछि दिल्ली पुलिसको स्पेसल सेलमाथि इन्टरनल इन्क्वायरी गरिएको थियो, त्यसलाई पनि फिल्ममा देखाइएको छ । सञ्जय कुमारको क्यारेक्टर त्यतिखेरका दिल्ली पुलिसका डीसीपी सञ्जीव यादवबाट प्रेरित छ । 

सञ्जय कुमार आफ्नो टीमका अधिकारी केके वर्मा, जितेन्द्र कुमार र अन्यको सहायताले दिल्ली र अन्य शहरमा भएका शृंखलाबद्ध बम विस्फोटका मास्टरमाइन्डलाई समात्न बाटला हाउस जान्छन् । त्यहाँ आदिल, दिलशाद र तुफैल लुकिरहेका हुन्छन् । परिस्थितिवश केके र पुलिस टीमले गोली चलाउनुपर्ने हुन्छ । गोलीकाण्डमा आदिलको मृत्यु हुन्छ । तुफैललाई प्रहरीले पक्राउ गर्छ र दिलशाद आफ्नो शहरतिर भाग्छ । 

तुफैल प्रहरीको केरकारमा इन्डियन मुजाहिद्दीनका कर्तूतलाई जायज ठहर्‍याउन खोज्छ । त्यसबीचमा प्रहरीमाथि मिडिया र मानवअधिकार संगठनहरूको नजर पर्छ । फर्जी इन्काउन्टर भएको भन्ने प्रश्न उठ्छ । धर्मको नाममा तीन निर्दोष युवालाई फसाइएको भन्ने कुरा आउँछ । धर्मको नाममा आरोपित देखिएका मानिस र उनीहरूमाथि हुने कारवाहीका विषयमा जाँच हुन थाल्छ । 

लेखक रितेश शाहले पिंक जस्तो फिल्म बनाएर गम्भीर सिनेमाका पारखीलाई खुशी पारेका थिए । यस फिल्ममा चाहिँ उनले आतंकलाई धर्मको नजरबाट हेर्नु गलत भएको देखाउन खोजेका छन् । 

सञ्जय कुमारको भूमिकालाई जोन अब्राहमले वास्तविकताको निकट राखेका छन् । तुफैल बनेका आलोक पाण्डेलाई निखिल आडवाणीले पूरा स्पेस दिएका छन् । आदिल अमीन बनेका क्रान्ति प्रकाश झाले शानदार अभिनय गरेका छन् । शहिदुर रहमानले दिलशादको भूमिकालाई न्याय गरेको अनुभूति हुन्छ । अन्य कलाकारको अभिनय पनि राम्रो छ । 

बाटला हाउसमा क्यारेक्टराइजेसन, लोकेसन र ट्रीटमेन्ट राम्रो छ । फिल्ममा नोरा फतेहीको आइटम नम्बर चाहिँ अनावश्यक थियो । 

फिल्मले सिस्टममा रहेको कमजोरीलाई वास्तविक रूपमा देखाएको छ । फिल्मको सम्पादन राम्रो भएकाले १४६ मिनेटको फिल्म भए पनि लामो लाग्दैन । आफ्नै गतिमा फिल्म निष्कर्षसम्म पुग्छ ।

फिल्म : बाटला हाउस
कलाकार : जोन अब्राहम, मृणाल ठाकुर, रवि किशन, राजेश शर्मा र क्रान्ति प्रकाश झा
निर्देशक : निखिल आडवाणी
विधा : याक्सन थ्रिलर
अवधि : १४६ मिनेट

दैनिक भास्करमा प्रकाशित समीक्षा
 

साउन ३०, २०७६ मा प्रकाशित

प्रतिक्रिया दिनुहोस