काठमाडौं – बालुवाटारस्थित भरिभराउ बैठककक्षमा प्रसन्न मुद्रामा प्रवेश गर्दै प्रधानमन्त्री केपी शर्मा ओलीले सोधे– 'म सिकिस्तै भएँ कि भन्ने लागेर भेट्न आउनुभएको हो कि क्या हो ?' अनि उनले आफ्नो स्वास्थ्य अवस्था सामान्य रहेको बताए ।

बालुवाटारमा बसेको पार्टी सचिवालय बैठकको अध्यक्षता गर्न जानुअघि आफ्नो प्रतीक्षा गरिरहेका झापा क्षेत्र न. ५ का अगुवा कार्यकर्तासँग ओलीको भेटको प्रसंग हो यो ।

झापा ५ नं. निर्वाचन क्षेत्र र समग्र जिल्लाको विकास निर्माणका सम्बन्धमा चर्चा गर्न बालुवाटार पुगेका नेकपाका अगुवा कार्यकर्तासँग प्रधानमन्त्री ओलीले आफ्नो स्वास्थ्यको विषयमा चलाइएका निराधार हल्लाहरूको प्रसंग उल्लेख गर्दै भने, 'हिजो मलाई एकछिन ९९ देखि १०० डिग्री ज्वरो आएको थियो । एउटा सिटामोल खाइदिएपछि सबै निको भयो । तर, अफवाह भने म सिकिस्त भएजस्तै फैलाइयो ।'

प्रधानमन्त्री ओलीले आफ्नो स्वास्थ्यका सम्बन्धमा सरोकार राख्ने शुभचिन्तकहरूलाई निश्चिन्त हुन आग्रह गरे ।

'गत साता सिंगापुरमा आँखा,कान,घाँटी र बुढी औंलादेखि कान्छी औंलाका नङसम्म परीक्षण गरेर आएको छु । डाक्टरले सबै अंग ठीक छ भनेका छन् । अब २०–२५ वर्ष केही हुँदैन भन्छन् । त्यसकारण म बिरामी होइन ।'

प्रधानमन्त्री ओलीले आफू १५ वर्षअघि बिरामी भएको र १२ वर्षअघि मिर्गौला प्रत्यारोपण गरेको स्मरण गरे ।

'म अहिले होइन ,१५ वर्षअघि बिरामी थिएँ । १२ वर्षअघि मिर्गौला प्रत्यारोपण गरेको हुँ । त्यही कहानीलाई अहिले प्रचार गरिएको छ ।'

उनले थपे- 'मलाई बिरामी नै भन्ने हो भने पनि म बिरामी हुँदाहुँदै चुनावमा मोर्चा बनाएर पार्टीलाई सफलता दिलाएँ । बिरामी हुँदाहुँदै बहुमत दिलाएँ । सरकार बनाएँ र बिरामी हुँदाहुँदै पार्टी एकिकरण गरें ।'

सो क्रममा नेकपा अगुवा कार्यकर्ताहरूले झापा क्षेत्र नं ५ को दमक ,गौरादह नगरपालिका र कमल गाउँपालिकामा औद्योगिक पार्क निर्माण गर्ने परियोजना स्वीकृत गराइदिएकोमा धन्यवाद दिए ।

भेटमा प्रधानमन्त्री ओलीले औद्योगिक पार्क निर्माण हुन लागेकोमा सबैलाई बधाइ समेत दिए ।