काठमाडौं – भारतको राजस्थानमा १३ फीट लामो अजिंगरले एउटा भुस्याहा कुकुरलाई पूरै निलेर ओकलेको छ । 

यो खतरनाक दृश्यको भिडियो एक वन्यजन्तुप्रेमीले खिचेका हुन् । 

घाँसमा घस्रिँदै गरेको अजिंगर रोकिन्छ अनि कुकुरलाई ओकल्न थाल्छ । कुकुरलाई अजिंगरले टाउकोतिरबाट निलेको थियो । 

१४ सेकेन्डभित्र कुकुरको शरीर बाहिर निस्कन्छ ।

आफ्नो मोबाइल फोनमा भिडियो खिच्ने व्यक्तिले भने, ‘बुधवार बिहान हामीहरू पशु उद्धार कारवाहीमा व्यस्त थियौं । बाटोमा हामीले एउटा अजिंगरलाई मानिसहरूले सताइरहेको देख्यौं । हामीहरू अजिंगर नजिक पुग्दा उसले निलेको भुस्याहा कुकुर ओकल्दैथियो । अजिंगरलाई कुनै कुरा निल्न आधा घन्टा लाग्छ र उनीहरू आफ्नो मुखभन्दा ठूलो प्राणीलाई पनि निलिदिन सक्छन् ।’

‘अजिंगरलाई निलेको कुरा ओकल्न निकै शक्ति खर्च गर्नुपर्छ । उनीहरूले नजिकै शिकारी देखे भने ऊर्जा बचाउन आफूले निलेको शिकार ओकल्छन् अनि भाग्छन् ।’

हालैका दिनमा भारतका गाउँमा अजिंगरहरूले बोका र कुकुर निल्ने घटना बढेको छ ।

एजेन्सी