काठमाडौं– आइडिया स्टूडियोको चौथो सिजन शुरू भएको छ ।

सोचदेखि उद्योगसम्म भन्ने मूल नारा लिएर सञ्चालित आइडिया स्टूडियोको चौथो सिजन थप परिष्कृत र प्रभावशाली ढंगले सञ्चालन हुने विश्वास आयोजकले लिएको छ ।

आइडिया स्टूडियोको यस सिजनका लागि व्यक्तिको सोचलाई उद्योगसम्म पुर्‍याउनका लागि आफ्नो आइडिया पठाउने मिति गएको साउन १६ गतेबाट असोज १ गते सम्मका लागि तोकिएको छ ।

यस अवधिभित्र पठाइने उद्योग व्यवसायसम्बद्ध आइडियाहरूले आइडिया स्टूडियो सिजन ४ का लागि स्थान पाउनेछन् ।

निर्धारित मितिभित्र पठाइएका आइडियाहरूले टेलिभिजन रियालिटी शोमा स्थान पाउनुका साथै तालिमको व्यवस्था र उत्कृष्ट ठहरिएका ४ आइडियाहरूले रु. ५ लाख बराबर सिड इन्भेष्टमेन्ट समेत प्राप्त गर्नेछ ।

आइडिया पठाउने फारम भर्नका लागि http://ideastudio.org.np/ लग इन गर्नु पर्नेछ ।

के हो आइडिया स्टूडियो ?

आइडिया स्टूडियो नेपाल हरेक व्यक्तिको व्यासायिक सोचलाई उद्यमशिलतासंग जोडेर उद्यमी बन्न प्रेरित गर्दै समाजमा नै व्यवसायिक परिवर्तन गराउने एक उत्कृष्ट माध्यम हो ।

व्यक्तिको नविन र सकारात्मक सोचले नै नयाँ आवीश्कार हुन सक्दछ र त्यसले समाज र राष्ट्रमा नै महत्वपूर्ण योगदान पुग्न सक्छ भन्ने ध्येयका साथ यस अघि आइडिया स्टूडियोका तीनैवटा सिजन सम्पन्न भइसकेका छन, र यो निकै प्रभावकारी साबित भइसकेको छ ।

सन् २०१४ बाट शुरू भएको आइडिया स्टूडियोमा मुलुकभरबाट १५०० भन्दा धेरै आइडियाहरू प्राप्त भइसकेका आयोजकले जनाएको छ ।

त्यसमध्ये ९० वटाभन्दा धेरै आइडियाहरूले सफलतापूर्वक व्यवसायिक बाटोमा यात्रा गरिरहेका दाबी पनि उसले गरेको छ ।

आइडिया स्टूडियोमा आउनुअघि र आइसकेपछि आफ्नो सोच अनुसारको व्यवसायमा आएको परिवर्तन देखेर उद्यमीहरू निकै उत्साही छन् ।

नेपाली उत्पादन प्रवर्द्धन गर्ने, सामाजिक रूपान्तरणमा योगदान पुर्‍याउने, प्रविधि सम्बद्ध तथा हरियाली र पर्यावरण प्रवर्द्धन गर्ने आइडियाहरूले विशेष ग्राहयता प्राप्त गर्नेछन् ।

स्वनिर्भरता र आर्थिक समृद्धिको यात्रामा सहभागी भई आफ्नो सोचलाई आइडिया स्टूडियो मार्फत उद्योगसम्म पुर्‍याउन आइडिया स्टूडियो नेपालले अपिल गरेको छ ।