काठमाडौं – फ्रान्सको राजधानी पेरिसमा एक व्यक्तिले वेटरलाई गोली प्रहार गरी हत्या गरेका छन् । स्यान्डविच ल्याउन ढिलो गरेको भन्दै उनले गोली हानेका थिए । 

ती व्यक्ति नोइजी–ल–ग्राँस्थित एक रेस्टुराँमा शुक्रवार राति खाना खान गएका थिए ।

स्यान्डविच छिटो नल्याएको भन्दै उनी बेस्सरी रिसाएको एक प्रत्यक्षदर्शीले बताए । 

उनले एउटा ह्यान्डगनले वेटरको काँधमा गोली हानेका थिए अनि तत्कालै रेस्टुराँबाट भागेका थिए । उक्त रेस्टुराँ हालसालै मात्र खुलेको थियो । 

वेटरका सहकर्मीहरूले प्रहरीलाई बोलाए अनि गोली लागेका पीडितलाई होशमा ल्याउन खोजे । तर घटनास्थलमै उनको मृत्यु भयो । 

प्रहरीले हत्याको अनुसन्धान शुरू गरिएको बताएको छ । 

नोइजी–ल–ग्राँ पेरिसको एक सबर्ब क्षेत्र हो । त्यहाँ बेरोजगारी र अपराध उच्च दरमा छ ।

लागूऔषध कारोबार उच्च हुने र सार्वजनिक स्थानमा रक्सी पिएर होहल्ला हुने ठाउँका रूपमा त्यो चिनिन्छ ।

एजेन्सी