काठमाडौं – ‘राष्ट्रका लागि खेलकुद, स्वास्थ्यका लागि खेलकुद’ भन्ने नाराका साथ ‘प्रधानसेनापति ट्रफी २०७६’ खेलकुदको शुरूवात भएको छ ।

प्रधानसेनापति पूर्णचन्द्र थापाले सोमवार खेलकुदको उद्घाटन गरेका छन् ।

खेलकुद प्रतियोगितामा एथ्लेटिक्स, स्वीमिङ, बक्सिङ, तेक्वान्दो, सुटिङ, भलिबल, बास्केटबल र फुटबल विधाका खेल समावेश भएको नेपाली सेनाले जनाएको छ ।

सोमवारबाट शुरूवात भएको ट्रफी २०७६ भदौ २५ गतेसम्म सञ्चालन हुनेछ । 

प्रतियोगिता भद्रकालीस्थित नेपाली सेनाको खेलकुद मैदानबाहेक छाउनीस्थित जगदल गण र लगनखेलस्थित सैनिक शारीरिक तथा खेलकुद केन्द्रमा सञ्चालन हुने सेनाले जनाएको छ ।

नेपाली सेनाभित्रका खेल प्रतिभाको पहिचान गरी उनीहरूको सीप विकास गर्दै राष्ट्रिय तथा अन्तर्राष्ट्रिय स्तरमा प्रतिस्पर्धा गर्न सक्ने क्षमतावान खेलाडी तयार गर्ने उद्देश्यका साथ २०६५ सालबाट शुरू भएको ‘प्रधानसेनापति ट्रफी’ नेपाली खेलकुद क्षेत्रको समग्र विकासको लागि कोसेढुंगा सावित भएको विश्वास नेपाली सेनाले बताएको छ ।