पाल्पा – रैनादेवी छहरा गाउँपालिकाको सहयोगमा वृद्ध दम्पतीको घर निर्माण गरिएको छ ।

वडा नम्बर ४ डोकेडाँडाका ७५ वर्षीय डिलबहादुर कामीको घर भूकम्पका कारण भत्किएको थियो । आर्थिक स्थिति कमजोर रहेकाले भत्केको घर बन्न सकेको थिएन ।

आर्थिक अवस्था निकै कमजोर रहेकाले उनले आफ्नै लगानीमा घर बनाउन सकेका थिएनन् । विक्रम संवत् २०७२ सालको भूकम्पका कारण घर भत्केको थियो । भूकम्पको मापदण्डअनुसार काम गर्न सक्ने अवस्था नै छैन ।

साँझ–बिहान के खाऊ भन्ने समस्या रहेको दम्पतीलाई सरकारी मापदण्डअनुसार घर निर्माणकार्यले चिन्तित बनाइरहेको थियो । 

सरकारी मापदण्डमा घर बन्न नसक्दा झनै जोखिमको अवस्था रहेकाले गाउँपालिकाले घर बनाउन सहयोग गरेको हो । गाउँपालिकाले घरका लागि कर्कटपाता र कामदार सहयोग गरेको गाउँपालिका प्रवक्ता विष्णु पोखरेलले बताए । कामीले नयाँ घर बनेपछि पहिलाको जसरी पानी परेका बेला कता जाने भन्ने चिन्ता हटेको बताए ।

गाउँपालिका प्रशासकीय अधिकृत ज्ञानराम पन्थीले आर्थिकरूपमा विपन्न समुदायका वृद्ध दम्पतीको बसोबासका लागि १ लाख ६० हजार आर्थिक सहयोगमा घर निर्माण गरिएको बताए । उनले प्रधानमन्त्री रोजगार कार्यक्रममार्फत कामदार परिचालन गरी एकतले घर निर्माण गरिएको जानकारी दिए ।

कामीको सामाजिक सुरक्षाभत्ता नियमित आम्दानी हो । आम्दानीका नाममा भत्ताबाहेक अरु केही छैन । चौमासिक रूपमा ८ हजार मात्र आम्दानी हुन्छ । उमेरले ७५ नाघेका कामीकी श्रीमती पूर्णकला पनि ६५ वर्ष काटे । केही श्रम गरी २/४ पैसा कमाउन निकै कष्ट छ ।

उनका ३ छोरा र १ छोरी छन् । उनीहरूको विवाह भइसकेको छ । उनीहरूको साथमा अहिले कोही पनि सन्तान बस्दैनन् । वृद्ध दम्पती गाउँपालिकाले बनाइदिएको २ कोठे नयाँ घरमा बस्न पाउँदा उत्साहित छन् ।