काठमाडौं – भक्तपुरको लोकन्थलीमा मंगलबार बिहान सुख्खा पहिरो जाँदा ८ घर जोखिममा परेका छन् । पहिरोका कारण एक घर खाली गराइएको छ भने पैदल हिँड्ने बाटोसमेत अवरुद्ध भएको छ ।

मंगलबार बिहान पौने २ बजे अरनिको राजमार्गदेखि २०० मिटरजतिभित्र पहिरो खस्दा सडक भत्किएको हो । पहिरोका कारण सो स्थानको बाटो भत्किएर पैदल हिँडडुल गर्न समेत अप्ठ्यारो भएको छ ।

स्थानीय प्रेम लामाका अनुसार खानेपानी विभागले पहिल्यैदेखि खानेपानी ट्यांकी निर्माणका लागि खाडो खनेको थियो ।

उक्त जग्गा खानेपानी विभागकै भए पनि स्थानीयले सो स्थानभन्दा माथि रहेका घरहरूलाई असर पर्ने भन्दै खाल्डो खन्न रोकेका थिए ।

‘सोमवार स्थानीयको विरोधका बीच खानेपानी विभागले खाल्डो खन्यो र राति सानो पानी पर्ना साथ पहिरो गयो’, एक स्थानीयले भने ।

घटनास्थलमा अहिले नेपाली सेना र प्रहरीको टोली परिचालन गरिएको छ।

जोखिममा परेका घरलाई जोगाउने पहल शुरू भएको छ ।

हेर्नुहोस्, भिडियो :

फोटोहरू :