काठमाडौं–संघीय संसदको प्रतिनिधिसभा बैठक आज (सोमबार) बस्दैछ । सोमबार दिउँसो १ बजे बस्ने साे बैठकमा शिक्षा, विज्ञान तथा प्रविधि मन्त्रालय र भौतिक पूर्वाधार तथा यातायात मन्त्रालय सम्बन्धी प्रश्नोत्तर गरिने कार्यसुची रहेको संघीय संसदको महासचिव मनोहरप्रसाद भट्टराईले जानकारी दिए । 

त्यस्तै, प्रतिनिधि सभाकै आजको बैठकमा विकास तथा प्रविधि समितिका सभापति कल्याणी कुमारी खड्काले ‘विज्ञापन (नियमन गर्ने) विधेयक सम्बन्धी समितिको प्रतिवेदन–२०७६’ पेश गर्ने कार्यसुची रहेको छ ।

सोमबार बस्ने प्रतिनिधिसभा बैठकमा गृहमन्त्री रामबहादुर थापाले ‘राज्य व्यवस्था तथा सुशासन समितिको प्रतिवेदन सहितको राष्ट्रिय परिचयपत्र तथा पञ्जीकरण विधयक,–२०७५ माथि छलफल गर्न प्रस्ताव गर्नेछन् ।
उनले आजै उक्त विधेयक पारीत गर्नका लागि प्रस्ताव गर्ने कार्यसूची रहेको संघीय संसदको महासचिव भट्टराईले जानकारी दिए ।