काठमाडौं – अमेरिकी अन्तरिक्ष निकाय नासाले अन्तरिक्षमा अपराध भएको भन्दै त्यसको अनुसन्धान गरिने जनाएको छ । 

अन्तरिक्षयात्री एनी म्याकलेनले अन्तरिक्षमा ६ महिना बस्दा आफ्नी पत्नीको बैंक खाताको जानकारी लिएको आरोप छ । 

द न्युयोर्क टाइम्समा प्रकाशित खबरअनुसार, म्याकलेन इन्टरनेसनल स्पेस स्टेसनमा ड्युटीमा हुँदा पूर्वपत्नीको बैंक खाताको जानकारी लिएकी थिइन् । नासाको आरोपपछि एनीले कुनै गलत काम नगरेको सफाइ दिइन् । 

एनी र उनकी पत्नी समर वार्डनले सन् २०१८ मा पारपाचुकेको निवेदन दिएका छन् । एनीले आरोपको प्रतिकार गर्दै परिवारको फाइनान्सको जानकारी मात्र लिन चाहेको बताइन् । 

एनीले भनिन्, ‘पारपाचुकेअघि समर र म दुवैजना समरको छोराको स्याहार गर्थ्यौं । समर बच्चाको स्कूल फीस र अन्य आर्थिक आवश्यकताका विषयमा लापरवाह थिइन् त्यसैले आर्थिक जानकारी जुटाएकी हुँ ।’
पूर्व एयरफोर्स इन्टेलिजेन्स अधिकारी वार्डनले संघीय व्यापार आयोगमा गुनासो दर्ता गराएकी हुन् । 

केही दिअघि मात्र आरोपित एनीलाई नासाको अल फिमेल स्पेसवाक कार्यक्रमबाट हटाएको थियो । तर नासाले सफाइ दिँदै आरोपका कारण नभई स्थानको कमीका कारण यसो गरिएको बतायो । एनीका वकिलले अनुसन्धानमा पक्षले पूर्ण सहयोग गरिरहेको बताए । 

इन्टरनेसनल स्पेस सेन्टर पाँच राष्ट्रिय तथा अन्तर्राष्ट्रिय स्पेस एजेन्सीको संयुक्त इकाइ हो । यहाँ कुनै अन्तरिक्षयात्रीले अपराध गरेमा उसमाथि आफ्नै देशको नियमअनुसार कारवाही गरिन्छ । अन्तर्राष्ट्रिय स्पेसको नियमको पालन पनि अन्तरिक्षयात्रीहरूले गर्नुपर्ने हुन्छ ।

एजेन्सी