काठमाडौं – हङकङमा विरोधकर्ताहरूले अश्रूग्यासका शेललाई प्रहरीतिरै हुर्‍याउन टेनिस र्‍याकेट प्रयोग गरेका छन् । हप्तौंदेखि चलिरहेको प्रदर्शन रोक्नका लागि प्रहरीले पहिलोपटक गोली पनि प्रहार गरेको छ । 

तनाव बढिरहँदा प्रहरीको दमनबाट बच्न उनीहरूले धातुका पोल र खेलकुदका सामग्री उपयोग गरेको देखिएको छ । 

चुएन वान जिल्लामा सोमवार दिउँसो निकालिएको जुलुस हिंस्रक झडपमा परिणत भएपछि मुकुण्डो लगाएका युवाहरूले प्रहरीलाई लट्ठीले हान्ने र ढुंगा हिर्काउने काम गरे । 

प्रहरीले भीडलाई तितरबितर पार्न अश्रूग्यास फ्याँक्नुअघि चेतावनीका झण्डाहरू उचालेको थियो । क्रुद्ध भीडले चाहिँ इँटा र पेट्रोल बम प्रहार गरेको थियो । 

थुप्रै प्रहरी अधिकारीहरूले आफ्नो बन्दूक समेत निकालेका थिए । ‘मैले बुझेसम्म एकजना सहकर्मीले भर्खरै गोली प्रहार गरे,’ सुपरीवेक्षक ल्युङ क्वोक विनले पत्रकारहरूलाई बताए ।  

‘बर्दीमा रहेका प्रहरीले बन्दूक चलाएको मेरो प्रारम्भिक बुझाइ छ ।’

एजेन्सी