महोत्तरी – महोत्तरी जिल्लाको महोत्तरी गाउँपालिकामा ‘समता र समावेशी शिक्षा कार्यक्रम अन्तर्गत प्रारम्भिक कक्षा सिकाई सम्बन्धी २ दिने कार्यशाला गोष्ठी सम्पन्न भएको छ ।

युनिसेफ विश्व शिक्षाको सहयोग एवं महोत्तरी गाउँपालिका तथा समाज विकास केन्द्र महोत्तरीको आयोजनामा भएको सो गोष्ठीमा महोत्तरी गाउँपालिका भित्र रहेका ११ सामुदायिक विद्यालय र २ मदरसाका कक्षा १ देखि ३ सम्मका १ हजार ८६ छात्रा, ९ सय ४४ छात्र गरी जम्मा २ हजार ३० छात्रछात्राहरु प्रत्यक्ष रुपमा लाभान्वित भईरहेको प्रारम्भिक कक्षा सिकाई कार्यक्रमको उपलब्धी सम्बन्धमा विस्तृत छलफल भएको थियो ।

पालिकाको १३ वटै विद्यालयमा प्रारम्भिक कक्षामा अध्ययनरत विद्यार्थीहरुको लागि सञ्चालित कार्यक्रमले कसरी प्रभाव पारेको तथा कार्यक्रमलाई थप प्रभावकारी बनाउन के के गर्न सकिनेबारे सरोकारवाला सबै पक्षसँग वृहत छलफल गरी योजना निर्माण तथा योजना कार्यान्वयन सम्बन्धी प्रतिबद्धता जाहेर गराइएको थियो ।

गाउँपालिकाकै कार्यालयमा २ दिनसम्म सञ्चालन भएको सो गोष्ठीमा त्यस पालिकाका ६ वटै वडाका वडा अध्यक्षहरु, बोर्ड सदस्यहरु, शिक्षा संयोजक रामविनोद ठाकुर लगायतले विभिन्न १३ वटै विद्यालयहरुमा प्रारम्भिक कक्षा सिकाई कार्यक्रम सञ्चालनमा रहेका भौतिक, आर्थिक, जनशक्ति लगायतका समस्याहरुको बारेमा ध्यानाकर्षण गराएका थिए ।

सो क्रममा कही भवन, जग्गा, कही शौचालय, कहि बालमैत्री वातावरण, कही विद्यार्थी अनुपातमा शिक्षक अभाव, कक्षाकोठा अभाव, तालिम प्राप्त शिक्षकको अभाव, कही पानी र सर सफाईको अभाव, कही फर्निचर, कही व्यवस्थापन समिति नै नभएको र प्रायः सबै विद्यालयमा सम्बन्धित निकायको अनुगमनको कमी रहेको औंल्याइएको थियो । जसले प्रारम्भिक कक्षा सिकाईमा प्रतिकुल असर पारिरहेको गोष्ठीमा औंल्याइएको थियो ।

विभिन्न समस्या देखिएपछि सम्वद्ध सरोकारवालाले प्रारम्भिक कक्षा सिकाइमा अवरोधको रुपमा रहेका ती सबै अभाव र समस्यालाई आउँदा दिनमा विद्यालयबाट विस्थापित गर्दै जाने र चाँडै कार्यक्रमले बोकेको उद्देश्य अनुरुप सबै विद्यालयका प्रारम्भिक कक्षा सिकाईमा प्रभावकारिता ल्याउने प्रतिवद्धता प्रकट गरिएको थियो ।

सो क्रममा सरोकारवाला वक्ताले विद्यार्थीहरुले नेपाली वा अंग्रेजी भाषा बुझ्न नसक्ने भएमा तथा विद्यार्थीले माग गरेमा सबै विद्यालयमा मातृभाषा लागु गरी पढाई सीप शिक्षण सिकाइमा सुधार ल्याउने, प्रारम्भिक कक्षा पढाई कार्यक्रमका लागि प्रणालीगत क्षमता विकास र सहयोग अभिवृद्धि गर्ने र पढाईका लागि अभिभावक, परिवार र समुदायको सहभागितामा बृद्धि गर्ने तथा आवश्यक भौतिक, आर्थिक र जनशक्तिमूलक सहयोग उपलब्ध गराउने प्रतिबद्धता प्रकट गरेका थिए ।

गोष्ठीमा समाज विकास केन्द्र महोत्तरीका कार्यक्रम संयोजक मो.अनवर परवेज र युनिसेफ विश्व शिक्षाका फिल्ड अफिसर रिशुमाया चौधरीले कार्यक्रम सम्बन्धी विभिन्न जानकारी गराउँदै सहजकर्ताको भूमिका खेलेका थिए ।