सुर्खेत- जिल्ला प्रहरी कार्यालय सुर्खेतले गाई हत्या प्रकरणमा पाँच जनालाई नियन्त्रणमा लिएको छ ।

जिल्ला प्रहरी कार्यालय सुर्खेतका डिएसपी रवि रावलका अनुसार ना ६ ख ४९४९ ट्रक चालक रौतहट चन्द्रपुर नगरपालिका २ का ३२ वर्षीय दामोदर केसी, ना ६ ख ९९०५ नम्बरको सवारी चालक बाँके कोहलपुर नगरपालिका १४ का ३४ वर्षका हिम ब.जिसी, ना ६ ख ९१७७ नम्बरका सवारी चालक चितवन राप्ती नगरपालिका ४ का २८ वर्षीय विवेक कुवँर रहेका छन ।

भे १ ख १०१५ नम्बरका चालक चितवन राप्ती नगरपालिका ५ का २७ वर्षीय सागर बिश्वकर्मा र ना ५ ख ६६७४ नम्बरका सवारी चालक नवलपरासी सरावल गाँउपालकिा १ का २९ वर्षीय सुकधन चौधरीलाई नियन्त्रणमा लिएको उनको भनाई छ ।

सुर्खेतको वीरेन्द्रनगर नगरपालिकाको कटकुवामा दर्जनौं गाईको हत्या गरिएका गाई नेपालगंज उपमहानगरपालिकाले पठाएका गाई रहेको खुलेको छ ।

जिल्ला प्रशासन कार्यालय बाँकेले नै चिठी लेखेर नेपालगंज उपमहानगरपालिका अन्र्तगतको कान्जिहाउसमा रहेका करिब ३ सय ७० गाई सुर्खेत हुँदै दैलेखको श्रीस्थानसम्म पुर्याउन सहयोग गरेको पत्र लेखेको भेटिएको हो ।

यही भदौ ८ गते कार्यपालिकाको निर्णय अनुसार उपमहानगरपालिकाले जिल्ला प्रशासनलाई पत्रको लागि अनुरोध गरेको पत्रमा उल्लेख छ ।

स्थानीयले दर्जनौं गाई मारेको खबरपछि सुर्खेतको वीरेन्द्रनगर नगरपालिका वडा नम्बर ७ का वडा अध्यक्ष ध्रुव कुमार चपाई, १४ का वडाका अध्यक्ष टोप बहादुर दर्लामी, वीरेन्द्रनगर नगररपालिकाका कर्मचारी र पशु चिकित्सकसहितको टोलीले स्थलगत निरिक्षण गरेको थियो ।

स्थलगत निरिक्षणपछि टोलीले १६ वटा गाई मृत अवस्थामा भेटाएको थियो । जसमा १२ वटा गाई, ४ वटा गोरु मृत अवस्थामा भेटिएका छन् ।

मृत गाईहरूको मुचुल्का र पोष्टमार्टम वीरेद्रनगरनगरपालिकाले गरेको छ । अन्य ७ वटा गाई गम्भीर घाइते अवस्थामा रहेका र अन्य गाईहरु यत्रतत्र छरिएको अवस्थामा भेटिएको प्रहरीले बताएको छ ।

वीरेन्द्रनगर नगरपालिकाका प्रमुख देव कुमार सुवेदीले घाइते गाईको उपचार गरिरहेको र प्रहरीलाई आवश्यक कारवाही थाल्न अनुरोध गरेको बताए ।

‘हामीले गाई प्रकरणमा सहभागी जोसुकै भएपनि कडा कारवाही गर्न प्रहरीलाई अनुरोध गरेका छौं,' उनले भने, ‘नगरपालिकाले छाडा चौपायालाई व्यवस्थापन गर्न गौशाला निर्माण पनि गरिरहेको छ ।’