प्रदेश सरकारबाट संघ मातहत लिइएको धनगढी–खुटिया सडक अलपत्र

भदौ २६, २०७६

अत्तरिया – कैलालीको धनगढी–खुटिया सडक अलपत्र अवस्थामा पुगेको छ । प्रदेश सरकारबाट सङ्घ मातहत लिइएको सडक कहिले निर्माण हुने हो भन्ने टुङ्गो नलाग्दा  अलपत्र परेको हो ।

धनगढीदेखि खुटियासम्मको १० किलोमिटर सडक निर्माण नहुँदा सो बाटो हुँदै यात्रा गर्ने यात्रु मारमा परेका छन् । केन्द्र सरकारको मातहत रहेको सडक केही समय पहिले प्रदेश मातहतमा थियो ।


ADVERTISEMENT

प्रदेश सरकारले सो सडक बनाउने पहल नगरेपछि फेरि सङ्घ सरकार अन्तर्गत राखिएको छ । विसं २०६४ मा धनगढी खुटियासम्म १० किलोमिटर  सडक कालोपत्र गरिएको थियो ।

कालोपत्र गरेको वर्ष दिन नपुग्दै भत्केपछि सडक मर्मत हुन नसक्दा अलपत्र अवस्थामा रहेको धनगढी उपमहानगरपालिका– ११ का हेम विष्टले बताउनुभयो । 

उनका अनुसार १० वर्षदेखि सडकको सामान्य मर्मत पनि हुन सकेको छैन । अहिलेसम्म कुनै पनि निकायले सडक निर्माण कार्यमा चासो नदेखाएको विष्टको भनाइ छ । 

धुलो धुवाँका कारण स्थानीयवासी समेत हैरान हुँदै आएका छन् ।  सो सडक निर्माणका लागि दबाब दिन पटक–पटक स्थानीय बासिन्दाले आन्दोलन गर्दै आए पनि सडक मर्मतमा कसैले ध्यान नदिएको स्थानीयवासीको गुनासो छ । 

वर्षातमा हिलो तथा हिउँदमा उड्ने धुलो धुवाँका कारण मानव स्वास्थ्यमा नकारात्मक असर पर्दै आएको छ । १० वर्ष पहिले पिच बनेको सडकमा ठूलाठूला खाल्डाखुल्डी छन् । 

धनगढी खुटिया सडक निर्माणका लागि वडा कार्यालयबाट पहल भइरहेको धनगढी उपमहानगरपालिका– ११ का वडाध्यक्ष गङ्गाराम रानाले बताए ।

सडकमा स्थानीय तह र प्रदेश सरकारको बजेट पनि  पर्याप्त नभएको उनले जानकारी दिए ।

भदौ २६, २०७६ मा प्रकाशित

प्रतिक्रिया दिनुहोस