काठमाडौं – रुसको राजधानी मस्कोमा एक हजार फीटमाथि डोरीमा हिँडेर सातजना व्यक्तिले विश्वकीर्तिमान कायम गरेका छन् । 

रुस, जर्मनी, फ्रान्स र क्यानडाका खेलाडीहरूले ११ सय ४० फीट माथिबाट हिँडेर कीर्तिमान बनाएका हुन् । 

रुसका सर्गे शाकुतोले भने, ‘यो लगभग असम्भव घटना हो किनकि रुसमा यसो गर्नका लागि अनुमति विरलै मात्र दिइन्छ । मैले ड्रोन क्यामराबाट यसको तस्वीर लिएको हुँ ।’

यस समूहले पहिलेको कीर्तिमान ३३० फीटले तोडेका हुन् । गिनिज वर्ल्ड रेकर्डका कर्मचारीहरू घटनाका बेलामा उपस्थित थिए । 

घटना शनिवार र आइतवार ओको टावर र नेभा टावर्सको बीचमा भएको हो । ओको टावर भवन युरोपको दोस्रो सबभन्दा अग्लो भवन हो भने नेभा टावर्स निर्माणाधीन छ तर बनिसकेपछि युरोपको सबभन्दा अग्लो भवन बन्नेछ । 

यसअघि सन् २०१६ मा मेक्सिको सिटीको ८१० फीटमाथि अलेक्जेन्डर शुल्जले हिँडेर कीर्तिमान बनाएका थिए । 

एजेन्सी