काठमाडौ– बाँकेको खजुरामा भदौ २६ गते भएको जनजागरण कार्यक्रममा नेकपा कार्यकर्ताले नेपाली कांग्रेसकी जिल्ला सभापति किरण कोइराला लगायतमाथि भएको आक्रमणको घटना सम्बन्धमा गृहमन्त्री रामबहादुर थापाको जवाफ चित्तबुझ्दो नभएको भन्दै प्रमुख प्रतिपक्षी दल नेपाली कांग्रेसले प्रतिनिधिसभाको आइतवारको बैठक अवरुद्ध गरेको छ । 

बैठकको शुरूमै सभामुखसँग समय लिएर कांग्रेस प्रमुख सचेतक बालकृष्ण खाणले बाँके घटनामा गृहमन्त्रीको जवाफ माग गरेका थिए । प्रतिपक्षी दलको मागपछि सरकारका तर्फबाट गृहमन्त्री रामबहादुर थापाले जवाफ दिँदै घटनालाई गम्भीर रूपले लिएको, तीन जना पक्राउ परेको र दोषीमाथि कारवाही गर्ने प्रतिबद्धता जनाए । 

गृहमन्त्रीको जवाफ चित्तबुझ्दो नभएको भन्दै कांग्रेस सांसदहरुले उनीसँग प्रतिपश्न गरेका थिए । सांसदहरूको प्रश्नको जवाफ दिँदै मन्त्री थापाले बाँके घटनामा कांग्रेसको कार्यकममा आक्रमण गर्ने नेकपाको नियत नरहेको स्पष्ट गरे । 

गृहमन्त्रीले जवाफ दिइसकेपछि कांग्रेस सांसदहरू उठेर विरोध जनाएका थिए । गृहमन्त्रीको जवाफपछि सचेतक पुष्पा भुसालले कांग्रेसमाथिको हिंसक आक्रमणलाई सामान्य घटना भनेर सामान्यकीकरण गरेको भन्दै आपत्ति जनाइन् । ‘प्रतिपक्षी दलको कार्यक्रम थाहा छैन भन्नु गृह प्रशासनको नियत के हो ?’ उनले प्रश्न गरिन् । 

कांग्रेस सांसदको विरोधपछि सभामुख कृष्णबहादुर महराले संसद बैठक १० मिनेटका लागि स्थगित गरेका छन् ।