सीआईएले यसरी गराउँथ्यो परेवालाई जासूसी

भदौ ३१, २०७६

काठमाडौं – अमेरिकाको जासूसी संस्था सीआईएले शीतयुद्धका बेलामा उपयोग गरिएको गोप्य तरिकाको बारेमा अहिले आएर खुलासा गरेको छ ।

सीआईएले परेवाहरूलाई तालिम दिएर जासूसीका लागि तयार पारेको बताएको छ । 


ADVERTISEMENT

सोभियत संघका संवेदनशील क्षेत्रमा पुगेर गोप्य तरिकाले तस्वीर खिच्न परेवालाई सिकाउने गरिन्थ्यो । 

परेवाहरूलाई झ्यालनजिक उपकरण राख्ने तालिम पनि दिइन्थ्यो । परेवा बाहेक डल्फिनको उपयोग पनि गरिन्थ्यो । 

यी जनावरहरू गोप्य मिसनलाई सफल गराउन निकै उपयोगी ठहरिए । 

अमेरिकाको भर्जिनिया राज्यमा सीआईएको केन्द्रीय कार्यालय छ । त्यसमा एउटा संग्रहालय छ र आम मानिसका लागि अहिले त्यो बन्द गरिएको छ । 

त्यहाँ परेवाको एउटा मोडल राखिएको छ र त्यसमा क्यामरा बाँधिएको छ । 

सन् १९७० मा गरिएको कारवाहीको कोड नेम टकाना राखिएको थियो । उक्त कारवाहीमा परेवाको उपयोग तस्वीर खिच्नका लागि गरिएको थियो । 

परेवाको स्मरणशक्ति निकै बलियो हुन्छ । अनि ऊ आत्राकारी पनि हुन्छ । 

उसलाई जुनसुकै क्षेत्रमा उडाइएपनि लामो यात्रा गरेर घर फर्किन सक्ने कला उससँग हुन्छ । त्यसैले गर्दा सीआईए परेवाहरूलाई गोप् यमिसनमा उपयोग गर्थ्यो । 

परेवालाई जासूसी काममा उपयोग गर्ने काम पहिलो विश्वयुद्धमा भएको थियो । 

दोस्रो विश्वयुद्धमा बेलायतको जासूसी विभागको एक ब्रान्च एमआई १४(डी) ले जासूस परेवा सेवा शुरू गरेको थियो । 

परेवाहरूलाई एउटा डब्बामा राखेर प्याराशूटमा बाँधेर युरोपको आकाशमा उडाइन्थ्यो । परेवाहरूसँग केही प्रश्न पनि राखिन्थ्यो । 

लगभग एक हजार जासूस परेवाले गोप्य जानकारी जुटाएर फर्केको बताइन्छ । भी१ रकेट प्रक्षेपण गर्ने स्थान र जर्मन रेडार स्टेसनको जानकारी पनि यसैगरी जुटाइएको थियो । 

युद्धपछि बेलायतका जासूसी विभागहरूको संयुक्त समितिमा परेवा उपसमिति बनाइएको थियो । शीतयुद्धका बेलामा परेवाहरूलाई थप राम्रो तरिकाले उपयोग गर्ने विषयमा यसले विचारविमर्श गर्थ्यो ।

बेलायतले अधिकांश जासूसी अभियान बन्द गरे पनि सीआईएले परेवाहरूको शक्ति चिनेर तिनको थप राम्रो उपयोग गर्ने विचार गर्‍यो । 

अपरेसन टकानामा अन्य जनावर पनि उपयोग गरिएको पाइयो । फाइलहरूमा उल्लेख भएअनुसार, सीआईएले ४० ग्राम भार भएको वस्तुलाई कुने भवनको झ्यालमा राख्ने तालिम एउटा कागलाई दिएको थियो । 

सन् १९६० का फाइल हेर्दा सीआईएले अन्य देशको बन्दरगाहमा जासूसीका लागि डल्फिन उपयोग गरेको देखिन्छ । पश्चिमी फ्लोरिडामा शत्रुको जहाजमा आक्रमणका लागि डल्फिन तयार पारिएको थियो । 

समुद्रमा आणविक पनडुब्बी पत्ता लगाउनका वा विकिरणयुक्त हतियार चिन्नका लागि पनि डल्फिनलाई सिकाइएको थियो । 

बीबीसीबाट
 

भदौ ३१, २०७६ मा प्रकाशित

प्रतिक्रिया दिनुहोस