कावासोती – ग्रामीण क्षेत्रका नागरिकलाई स्वास्थ्य उपचारमा सहयोग पुर्‍याउने उद्देश्यले स्थानीय क्लबले एम्बुलेन्स खरीद गरेको छ ।

नवलपरासीपूर्व नवलपुरको कावासोती नगरपालिका–६ मा रहेको मातृभूमि युवा क्लबले एम्बुलेन्स खरीद गरेको हो ।

एम्बुलेन्स खरीदपश्चात ग्रामीण क्षेत्रमा कोही बिरामी परे उपचारका लागि अस्पताल लैजान सहज हुने क्लबका सचिव तीर्थ डुमे्रले बताए । कावासोती नगरपालिका–६ को २ लाख रुपैयाँ, विष्णुनगर सामुदायिक वनको २ लाख र क्लबको आन्तरिक स्रोतबाट एम्बुलेन्स खरीद गरिएको सचिव डुमे्रले बताए ।

एम्बुलेन्स खरीद गरेसँगै ग्रामीण क्षेत्रमा कोही आकस्मिक उपचार गर्नुपर्ने अवस्था भए समयमा अस्पताल पुर्‍याउन नसकी अकालमा ज्यान गुमाउनुपर्ने अवस्था नरहने कावासोती नगरपालिका–६ का अध्यक्ष हेमप्रसाद पाण्डेले बताए । ‘समयमा उपचारका लागि अस्पताल पुर्‍याउन नसक्दा कतिपयले अकालमा ज्यान गुमाउनुपर्ने अवस्था थियो, गाउँमै एम्बुलेन्स भएपछि कसैको समयमा अस्पताल नपुर्‍याएककै कारण ज्यान जाने जोखिम रहने छैन,’ वडाध्यक्ष पाण्डेले भने, ‘स्वास्थ्य उपचार सेवामा सहज हुनेछ ।’

वडाध्यक्ष पाण्डेले वडाभित्रका अशक्त, विपन्न परिवार र ८४ वर्ष उमेर कटेका ज्येष्ठ नागरिकलाई उपचारका लागि अस्पताल लैजाँदा एम्बुलेन्स प्रयोग गर्नुपरेमा सोको खर्च आफूले उपलब्ध गराउने समेत बताए ।

एम्बुलेन्स सेवाबाट कावासोती–६ सहित वडा नम्बर १, ५ लगायत आसपासका क्षेत्रका स्थानीय लाभान्वित हुने विश्वास लिइएको क्लबका अध्यक्ष भरत गौडेलले बताए । क्लबले हाल परिवार नियोजन संघसँगको सहकार्यमा प्रजनन् स्वास्थ्य क्लिनिकसमेत सञ्चालन गर्दै आएको छ ।

आगामी दिनमा प्रजनन् स्वास्थ्य क्लिनिकलाई थप व्यवस्थित गर्दै थप स्वास्थ्य उपचारको व्यवस्था उपलब्ध गराउने योजनासहित क्लब अगाडि बढेको उनले बताए । युवाहरू पनि सामाजिक काममा लाग्नुपर्छ भन्ने सन्देश दिनका लागि आफूहरूले स्वास्थ्य जस्तो महत्वपूर्ण क्षेत्रमा कार्य गर्दै आएको उनले बताए ।