काठमाडौं – सञ्चार तथा सूचना प्रविधि मन्त्री गोकुल बास्कोटाले संविधान संशोधन गर्नुभन्दा पहिला यसको पूर्ण रूपमा कार्यान्वयन हुनुपर्ने बताएका छन् । 

बिहीवार मन्त्रालयमा मन्त्रिपरिषद्को बैठकका निर्णय सार्वजनिक गर्ने क्रममा बास्कोटाले यसलाई च्यात्नै खोज्नेहरू पनि रहेको भन्दै कसैले चाहँदैमा केही हुन नसक्ने दाबी गरे । 

‘कसका लागि कुन धारा किन संशोधन गर्ने ?’ उनले प्रश्न गरे, ‘पहिला कार्यान्वयन हुन दिउँ । रहर लागेर संविधान संशोधन हुने होइन, औचित्य र आवश्यकताको आधारमा हुने हो ।’

नेपाली जनताले नै संविधान लेखेको भन्दै यसलाई संशोधन गर्न गाह्रो नभएको जिकिर गरे । ‘औचित्य पुष्टि हुनुपर्‍यो,’ उनले प्रश्न गरे, ‘यत्तिकै संविधान संशोधन हुन्छ ?’

बास्कोटाले संविधान कुनै रामायण, कुरान वा बाइबल नभएको टिप्पणी गरे । ‘यो रामायण होइन, यो कुरान पनि होइन, बाइबल पनि होइन,’ उनले भने, ‘यो अपरिवर्तनीय छैन । राष्ट्रको जीवनको गति अवरोध भयो भने संशोधन हो ।’