काठमाडौं – इजरायलमा हालै सम्पन्न आमनिर्वाचनपछि नयाँ राजनीतिक शक्तिको उदय भएको छ । 

आगामी समयमा इजरायलको कुनै अरब नेता हरेक महिना त्यहाँको जासूसी संस्था मोसादको बैठकमा भाग लिएमा कुनै आश्चर्य हुने छैन । इजरायल भ्रमण गर्ने सबै विदेशी राष्ट्रप्रमुखसँग अरब नेताले बैठक गरेमा पनि आश्चर्य हुने छैन । 

पहिलोपटक कुनै अरब नेताले इजरायली संसदमा प्रतिपक्षी दलको नेताको भूमिका निर्वाह गर्न सक्नेछ । 

चुनावपछि सत्तामा को आउँछ भन्ने कुरा निश्चित छैन तर इजरयालका अल्पसंख्यक अबरहरूले प्रधानमन्त्री बेन्जामिन नेतान्याहुको सत्तामा पकड कमजोर भने बनाउनेछन् । 

इजरायलमा मंगलवार आमनिर्वाचन सम्पन्न भएको थियो । लगभग ९७ प्रतिशत भोट गणना भइसकेको छ । १२० सीट भएको इजरायली संसदमा नेतान्याहुको लिकुड पार्टीले ३१, बेनप् ग्यान्जको ब्लु यान्ड ह्वाइट पार्टीले ३३ र अरब पार्टी जोइन्ट लिस्टले १३ सीट पाएका छन् । अन्य दलले ४१ सीट जितेका छन् । 

अरब पार्टीहरू बलियो हुनुको सबभन्दा ठूलो कारण उनीहरूको एकता हो । यसपटक अरब पार्टीहरूले जोइन्ट लिस्टको ब्यानरमा रही गठबन्धन बनाएर चुनाव लडे । 

अप्रिलमा भएको निर्वाचनमा तीनवटा अरब दलमा मतभेद हुँदा बेग्लाबेग्लै गरी चुनाव लडेका थिए ।

यसपालि नेतान्याहुले अरब नेताहरूलाई बेवास्ता गरेर आफ्नो दक्षिणपन्थी आधारलाई बलियो बनाउने रणनीति अपनाए । यो रणनीति असफल भयो र मतदान बहिष्कार गर्ने अरबहरू समेत ठूलो संख्यामा मताधिकार उपयोगमा लागे ।

पाँच महिनाअघिको चुनावमा अरब मतदातामध्ये ४९ प्रतिशतले मत दिएका थिए भने यसपालि ६० प्रतिशतले दिए । इजरायलमा अरब मतदाताको संख्या १८ लाख छ र कुल मतदाताको लगभग २० प्रतिशत संख्या त्यो हो ।

अघिल्लो चुनावमा भन्दा पनि खराब प्रदर्शन गरेपछि नेतान्याहुले ब्लु यान्ड ह्वाइट पार्टीका बेनी ग्यान्जसँग बृहत्तर एकताबद्ध सरकार गठनमा साथ दिन आह्वान गरेका छन् । यस्तो अवस्थामा जोइन्ट लिस्टको भूमिका महत्त्वपूर्ण हुनेछ । 

जोइन्ट लिस्टको भूमिकाका विषयमा दुईवटा सम्भावना छन् । लिकुड र ब्लु यान्ड ह्वाइट मिलेर गठबन्धन सरकार बनाए भने जोइन्ट लिस्टका नेता अयमान ओदेह इजरायली संसद्को विपक्षी दलको नेता बन्ने पहिलो अरब हुनेछन् । 

अर्को सम्भावना चाहिँ जोइन्ट लिस्टले मध्यमार्गी सरकारलाई बाहिरबाट समर्थन दिने हो । अरब दलहरूले पहिला पनि यस्तो गरिसकेका छन् । सन् १९९२ मा यित्ज्याक रबिनको सरकारलाई उनीहरूले बाहिरबाट समर्थन दिएका थिए । 

नेतान्याहुको लिकुड पार्टी दक्षिणपन्थी हो भने ग्यान्जको ब्लु यान्ड ह्वाइट पार्टी उदारवादी दल हो । प्यालेस्टाइनीहरूसँगको कुराकानीका विषयमा ग्यान्जको विचार बढी उदारवादी छ । 

ग्यान्जले नेतान्याहुको आह्वानमा प्रतिक्रिया दिएका छैनन् तर जोइन्ट लिस्टको ओदेहसँग सम्पर्क गरेका छन् । दुवै नेता कुराकानीका लागि सहमत भएका छन् ।

एजेन्सी