काठमाडौं – विश्वका सबै देशमा शुक्रवार जलवायु अभियन्ताहरूले विश्वव्यापी हडताल गरिरहेका छन् । पृथ्वीकै इतिहासमा जलवायुका विषयमा आजको दिन सबभन्दा ठूलो हुने अपेक्षा गरिएको छ । 

अस्ट्रेलियाको मेलबोर्नमा एक लाखभन्दा बढी मानिस सडकमा भेला भएका छन् ।

वैश्विक जलवायु हडताल विद्यालयका विद्यार्थीहरूले आयोजना गरेको जलवायु जुलूसको शृंखलामा तेस्रो कार्यक्रम हो । यसको नेतृत्व १६ वर्षीया ग्रेटा थनबर्गले गरिरहेकी छन् । 

थनबर्ग अहिले न्युयोर्कमा छिन् र सोमवार संयुक्त राष्ट्रसंघको क्लाइमेट याक्सन समिट हुँदैछ । थनबर्गका अनुसार, १३९ देशमा ४ हजार ६ सय ३८ कार्यक्रमहरू राखिएका छन् । 

सेप्टेम्बर २० अर्थात् आज हडताल गरेर विरोधकर्ताहरूले राजनीतिकर्मीहरू तथा नीतिनिर्माताहरूमाथि जलवायु मामिलामा दबाब दिन खोजेका छन् । 

थनबर्गले भनिन्, शुक्रवार हामीहरू हरित सम्झौताका लागि हडताल गर्दैछौं । आदिवासी भूमिमा इन्धन परियोजना बन्द गराउनका लागि, वातावरणीय न्यायका लागि, प्रकृतिको संरक्षण र पुनर्बहालीका लागि र दिगो कृषिका लागि हामीहरू हडताल गर्दैछौं ।’

अमेजन कम्पनीमा काम गर्ने १५ सयभन्दा बढी अभियन्ताहरूले शुक्रवार काम नगर्ने बताएका छन् भने माइक्रोसफ्टका कर्मचारीले पनि हडतालमा भाग लिने भनेका छन् । 

सीएनएनबाट