काठमाडौं – क्यालिफोर्नियाको माउन्टेन भ्यु जान लागेका अमेरिकी राष्ट्रपति डोनल्ड ट्रम्पको पछिल्तिरको खल्तीबाट २० डलरको नोट बाहिर निस्केको देखिएपछि मानिसहरू निकै उत्सुक भए । 

यसका बारेमा सोध्दा ट्रम्पले होटलमा टिप दिन आफूलाई खुबै मन लाग्ने भएकाले क्याश बोकेर हिँड्ने गरेको बताए ।

ट्रम्पले आफ्नो प्यान्टको पछिल्तिरको खल्तीबाट नोटको गड्डी निकाले अनि एयर फोर्स वानमा सँगै यात्रा गरिरहेका संवाददाताहरूका अगाडि राखिदिए । एक संवाददाताले यो नगद कहिले प्रयोग गर्नुहुन्छ भनी सोध्दा उनले भने, ‘मैले धेरै भयो यसको उपयोग गरेकै छैन । म त वालेट पनि राख्दिनँ ।’

उनले भने, ‘थुप्रै भयो त, मैले क्रेडिट कार्डको उपयोग गर्नुपरेको छैन । क्रेडिट कार्डबाट मलाई होटलमा टिप दिन गाह्रो हुन्छ । केही न केही बोकेर हिँड्न मलाई राम्रो लाग्छ । राष्ट्रपतिलाई शोभा दिन्छ दिँदैन थाहा छैन तर मलाई होटलमा टिप दिन खुबै मन लाग्छ ।’

एजेन्सी