काठमाडौं – क्यानडाका प्रधानमन्त्री जस्टिन ट्रुडोले अनुहारमा कालो दलेको तीनवटा तस्वीर लगालग प्रकाशित भएपछि माफी मागेका छन् । अरेबियन नाइट्स पार्टीमा उनले त्यसरी अनुहारमा कालो दलेका हुन् । 

सन् २००१ मा राखिएको अरेबियन नाइट्स पार्टीमा उनले अनुहारमा रंग दलेका थिए । त्यतिखेर उनी विद्यालयका शिक्षक थिए । उनले जमैकाको गीत डे–ओ गाउँदा ह्यारी बेलाफोन्टेको जस्तो लुगा लगाएको पनि स्वीकार गरे । 

आफूले त्यसरी अनुहारमा कालो र खैरो रंग दल्नु अस्वीकार्य थियो भन्ने ट्रुडोको भनाइ छ । 

उनले माफी मागे पनि यी तीनवटा घटनामा मात्र कालो दलेको कि अरू बेला पनि त्यसै गरेको भन्ने कुरा पुष्टि गरेनन् । एकजना संवाददाताले यस्ता किसिमका अन्य तस्वीर पनि छन् कि भनी चिच्याएर सोध्दा ट्रुडो मौन बसेका थिए । 

‘मैले गरेको कामले उक्त समुदायलाई चोट पुग्यो । आफ्नो पहिचानकै कारण व्यक्तिले असहिष्णुता र पक्षपातको सामना गर्नु हुँदैन । यसमा मलाई गहिरो पश्चात्ताप छ,’ उनले भने । 

क्यानडामा आमनिर्वाचन आउन लागेको बेलामा ट्रुडोको ‘कालो’ विगत सार्वजनिक भएपछि उनलाई चुनावमा अप्ठ्यारो पर्ने विश्लेषण गरिएको छ । 

एजेन्सी