पाल्पा– समयमा काम सम्पन्न गर्ने उपभोक्ता समितिका पदाधिकारीलाई सम्मान गरिएको छ ।

रिब्दीकोट गाउँपालिकाले हार्थोक–बतासे, मैदिया स्तरोन्नति उपभोक्ता समितिका अध्यक्ष नारायण भाट र सचिव दिवाकर अर्याललाई  गाउँपालिका अध्यक्ष नारायणबहादुर जिसीले जनही रु सात हजार ५०० सहित सम्मानपत्र प्रदान गरेका थिए ।

गत वैशाख १० गतेदेखि हार्थोक–बतासे, मैदिया सडक चौडा गर्ने काम शुरु गरिएकामा  असार १९ गते पूरा भएको थियो । सो सडक निर्माणका लागि निर्वाचन क्षेत्र नं २ का सांसद सोमप्रसाद पाण्डेले निर्वाचन क्षेत्र पूर्वाधार विकास कोषबाट  रु ५० लाख  उपलब्ध गराएका थिए । 

गाउँका  उपभोक्ताले पनि समयमा काम सम्पन्न गरुन् भनी प्रोत्साहन गर्न यो सम्मान गरिएकोे अध्यक्ष जिसीले बताएका थिए । 

गाउँपालिकाका प्रशासकीय अधिकृत ऋषि अर्यालले विकास निर्माणका काममा ढिलासुस्ती भइरहेका बेला करीब दुई महीनाको अवधिमा आठ किलोमिटर सडक चौडा बनाइएको जानकारी दिए ।