काठमाडौं – पाकिस्तानको परराष्ट्र मन्त्रालयले एक प्रश्नको उत्तर दिने क्रममा पाकिस्तानी सेनाका एक अधिकारी कर्नल हबीब जाहिर (सेवानिवृत्त) को नाम बुधवार लिएपछि उनको चर्चा चुलिएको छ । 

परराष्ट्र मन्त्रालयका अनुसार, यो प्रश्न भारतीय मिडियामा भारीय जासूस कुलभूषण जाधवसँग कर्नल हबीबको सम्बन्ध जोडेर सोधिएको थियो । तर परराष्ट्र मन्त्रलयले जोडिएको कुरालाई अस्वीकार पनि गरेन अनि पुष्टि पनि गरेन । 

पाकिस्तानी अधिकारीहरूले प्रश्न कसले गरेको भन्ने विषय पनि प्रस्ट नपारेको देखिन्छ । 

कर्नल जाहिर पाकिस्तानमा कुलभूषण जाधव पक्राउ परेको केही समयपछि नै सन् २०१७ मा लुम्बिनीबाट रहस्यमय रूपमा हराएका थिए । 

पाकिस्तानको परराष्ट्र मन्त्रालयले अप्रिल २०१७ मा कर्नल जाहिर नेपालबाट बेपत्ता भएको पुष्टि गर्‍यो र नेपाल सरकारसँग यस विषयको जाँच गर्नका लागि सम्पर्क गरिएको बतायो । 

जागिरको अन्तर्वार्ताका लागि नेपाल आइपुगेका कर्नल जाहिर यहीँबाट हराएका थिए । उनले आफ्नो सीभी लिंक्डइन र संयुक्त राष्ट्रसंघको एक वेबसाइटमा पोस्ट गरेका थिए । मार्क टम्सन नामक व्यक्तिले इमेल र टेलिफोन सम्पर्क गरेर उनलाई एक कम्पनीको उपाध्यक्षका लागि छानिएको बताए । 

जागिरको अन्तर्वार्ताका लागि काठमाडौं आउन उनलाई भनियो र उनलाई लाहौरबाट काठमाडौं आउनका लागि विमानको टिकट पनि पठाइयो । 

कर्नल जाहिरको परिवारका अनुसार, उनी पहिलोपटक नेपाल भ्रमण गरिरहेका थिए । काठमाडौं आइपुगेपछि उनले लुम्बिनी जानका लागि प्लेन टिकटको फोटो र विमानस्थलमा आफ्नो फोटो ह्वाट्सयाप मार्फत परिवारलाई पठाए । 
अप्रिल ६, २०१७ मा १ बजे पत्नीलाई फोन गरेर उनले आफू लुम्बिनी आइपुगेको बताए । त्यसपछि उनको मोबाइल बन्द भयो र परिवारसँगको सम्पर्क टुट्यो । 

भैरहवा विमानस्थलमा कर्नल जाहिर अन्तिमपटक देखिएका हुन् । 

पाकिस्तानको परराष्ट्र मन्त्रालयको बयान अनुसार, अहिलेसम्मको अनुसन्धानमा मार्क नामक व्यक्तिको बेलायती मोबाइल नम्बर झूटो थियो र यो इन्टरनेट कम्प्युटरमार्फत बनाइएको थियो । 

कर्नल जाहिरसँग सम्पर्क गर्न उपयोग गरिएको वेबसाइट भारतमा सञ्चालन गरिएको र पछि इन्टरनेटबाट हटाइएको पाकिस्तानको दाबी छ । 

नेपाल सरकारले कर्नल जाहिरको बेपत्ता जाँचका लागि विशेष दल गठन गरेको थियो तर अहिलेसम्म यसमा कुनै प्रगति हुन सकेको छैन । 

भारतीय सीमाबाट पाँच किलोमिटर मात्र टाढा रहेको लुम्बिनीबाट कर्नल जाहिर हराएपछि पाकिस्तानले भारतीय सरकारसँग उनको पत्ता लगाउन सहायता मागेको थियो । 

पाकिस्तानका अनुसार, भारतीय नागरिकहरूले लुम्बिनीमा कर्नल जाहिरको स्वागत गरे, उनलाई होटलमा बसाए र टिकट बूक गराए । 

तर भारतले यस विषयमा कुनै सकारात्मक प्रतिक्रिया दिएको छैन । 

पाकिस्तानी परराष्ट्र मन्त्रालयका अनुसार, कर्नल जाहिरको परिवार निकै पीडित छ र जबर्जस्ती बेपत्ता बनाइएका व्यक्तिको हितमा काम गर्ने संयुक्त राष्ट्रसंघीय संस्थासँग पनि सम्पर्क गरेका छन् । 

कर्नल जाहिर बेपत्ता बनाइनुमा शत्रुदेशका जासूसी निकायको सम्भावनालाई अस्वीकार गर्न नसकिने पाकिस्तानी परराष्ट्र मन्त्रालयका प्रवक्ताले बताए । 

कर्नल जाहिर बेपत्ता हुनुअघि सेवानिवृत्तिपछि फैसलाबादमा काम गरिरहेका थिए ।

बीबीसी हिन्दीबाट