सुर्खेत – कर्णाली प्रदेशका मुख्यमन्त्री महेन्द्रबहादुर शाहीको नाममा नक्कली फेसबूक आईडी खोलेर चरित्र हत्या गरेको सार्वजनिक भएको छ । 

मुख्यमन्त्री महेन्द्रबहादुर शाहीका प्रमुख स्वकीय सचिव खेमबहादुर सिंहले आइतबार एक विज्ञप्ति जारी गरी यस्तो जानकारी गराएका हुन् ।

‘सामाजिक सञ्जाल फेसबूकमा माननीय मुख्यमन्त्रीज्यूको नाममा नक्कली अकाउन्ट बनाई अवाञ्छित क्रियाकलाप भइरहेकोप्रति माननीय मुख्यमन्त्रीज्यूको सचिवालयको गम्भीर ध्यानाकर्षण भएको छ । सामाजिक सञ्जालको दुरुपयोग गर्दै माननीय मुख्यमन्त्रीज्यूको चरित्रहत्या गर्ने तथा आफ्नो व्यक्तिगत स्वार्थपूर्ति गर्ने उद्देश्यका साथ नक्कली आईडीबाट विभिन्न व्यक्ति तथा निकायमा च्याट सम्पर्क गरी आवाञ्छित निर्देशन तथा माग गर्ने गरिएको पाइएको छ,’ विज्ञप्तीमा भनिएको छ, ‘अवाञ्छित तत्वहरूबाट व्यक्तिगत स्वार्थ पूरा गर्ने मनसायका साथ गरिएको यस्तो क्रियाकलापको भ्रममा नपर्न सरकारी तथा गैरसरकारी निकाय, शुभचिन्तक, समर्थक तथा आमजनसमुदायलाई विनम्र अनुरोध गर्दछु । साथै यस्तो क्रियाकलापमा संलग्न व्यक्ति तथा समूहको पहिचान गरी कानुनी कारवाही गर्न सम्बन्धित निकायसँग आवश्यक समन्वय पनि भैसकेको छ ।’

मुख्यमन्त्री महेन्द्रबहादुर शाहीको व्यक्तिगत फेसवुक अकाउन्टको लिंक facebook.com/mahendra.shahi.165 रहेको जनाउँदै सचिवालयले मुख्यमन्त्रीका नाममा बनाइएका अन्य कुनै अकाउन्टबाट अवाञ्छित क्रियाकलाप भएमा सचिवालयको मोवाइल नं. ९८५८०९२२२२ मा सम्पर्क गर्न पनि अनुरोध गरेको छ ।

हेर्नुहोस्, विज्ञप्ति :