काठमाडौं– कृषि विकास बैंक ह्याकिङ प्रकरणमा बैंकको लहान शाखाका म्यानेजरसहित ३ कर्मचारी केन्द्रीय कार्यालय रामशाहपथ तानिएका छन् ।

गत साता भएको ह्यकिङ प्रकरणमा अनुसन्धान गर्नुपर्ने भएकाले केन्द्रमा आज (आइतवार)देखि हाजिर हुने गरी केन्द्रीय कार्यालयमा तानिएको कृषि विकास बैंकका आन्तरिक कन्ट्रोल प्रमुख तथा मानव संसाधन विभागका प्रमुख दीर्घप्रसाद अर्यालले बताए ।

‘कहीँ कतै संलग्नता छ कि भनेर अनुसन्धानका लागि केन्द्रमा तानेका हौं,’ अर्यालले भने, ‘हामीले केन्द्रमा एउटा समिति बनाएर उनीहरूसँग सोधपुछ गरिरहेका छौं ।’

दोषि पाइएमा विभागीय कारवाही गरी कानूनी कारवाहीका लागि प्रहरीलाई जिम्मा लगाउने अर्यालले लोकान्तरसँग बताए ।

अनुसन्धानका लागि कृषि विकास बैंकले लहान, पर्वत, स्याङ्जा, नवलपरासी लगायत बैंकका शाखामा अनुसन्धान टोली खटाएको र ती टोलीले भोलि (सोमबारसम्म) प्रतिवेदन केन्द्रीय कार्यलयमा बुझाइसक्ने अर्यालले बताए ।

‘भोलि (असोज १३) सम्म अनुसन्धान टोलीले प्रतिवेदन बुझाइसक्ने छन्, प्रतिवेदनको सुझावलाई हेरेपछि कारवाही प्रक्रिया अगाडि बढाउँछौं,’ उनले भने ।

बैंक ह्याकिङ गरेर ४ करोड ७३ लाख चोरीको अरोपमा ४ जनालाई प्रहरीले १३ गते प्रेसमिटमार्फत सार्वजनिक गरेको थियो भने ह्याकिङमा संलग्न भनिएका १२ जनामध्ये स्याङ्जाका रामकृष्ण भुसाललाई ६५ लाख खातामा ट्रान्सफर भएको देखिएपछि असोज ९ गते प्रहरी कृषि विकास बैंक स्याङ्जाको वालिङ शाखाबाट पक्राउ गरेको थियो । अन्य दुई जना पनि पक्राउ परेका छन् ।

उक्त प्रकरणका मास्टर माइन्ड भने पक्राउ परेका छैनन् । मुख्य अभियुक्त विदेशी नागरिक रहेको र उनी भारतमा रहेको प्रहरीको प्रारम्भिक अनुसन्धानमा खुलेको छ । 

महानगरीय प्रहरी अपराध अनुसन्धान महाशाखा टेकुमा बुधवार पत्रकार सम्मेलन गरी प्रहरीले ५ अर्ब चोरी गर्ने योजना आफूहरूले बिफल पारेको दाबी गरेको थियो ।