आईएसका कैदी युरोप जाने ट्रम्पको भनाइ

असोज २३, २०७६

काठमाडौं – टर्कीले उत्तरपूर्वी सिरियामा कुर्दिशहरूका विरुद्ध बुधवार आक्रमण थालेपछि कुर्दिशको कब्जामा रहेका इस्लामिक स्टेट (आईएस)का आतंकवादीहरू भाग्ने डर अमेरिकी अधिकारीहरूलाई लागेको छ । 

अमेरिकाले सिरियामा गरेको आईएसविरुद्धको कारवाहीलाई टर्कीको आक्रमणले हानिकारक असर पारेको अमेरिकी रक्षा मन्त्रालयका एक अधिकारीले बताए । 


ADVERTISEMENT

टर्कीको आक्रमणका कारण स्थानीय सुरक्षा बल निर्माण गर्ने, स्थिरता ल्याउने कारवाही गर्ने र ११ हजार खतरनाक आईएस लडाकूको निगरानी गर्ने सिरियन डेमोक्रेटिक फोर्सेसको क्षमतालाई चुनौती दिएको ती अधिकारीको कथन छ ।

आईएसका कैदीहरू भाग्ने भए त भनी अमेरिकाका राष्ट्रपति डोनल्ड ट्रम्पलाई सोध्दा उनले सबभन्दा खतरनाक आईएस कैदीहरूलाई सुरक्षित स्थानमा सारिएको बताए । 

उनले आईएस कैदीबाट हुने खतरालाई अवमूल्यन गर्दै भने, ‘अँ, तिनीहरू युरोपतिर भाग्नेछन् ।’

अमेरिकी अधिकारीहरूले ११ देखि १२ हजार आईएस लडाकूलाई युद्धभूमिमा समातिएको र जोखिमयुक्त अस्थायी कारागारमा राखिएको बताउँदै आएका छन् । तीमध्ये दुईहजार कैदी इराक वा सिरियाका हैनन् । ट्रम्पले दाबी गरे पनि सयौं कैदीहरू मात्र युरोपबाट आएका हुन् । 

तिनै अधिकारीहरूले कारागारको सुरक्षामाथि प्रश्नचिह्न रहेकोमा जोड दिए । सिरियन डेमोक्रेटिक फोर्सेसका सैनिकहरू टर्कीसँगको युद्धमा अग्रपंक्तिमा रहँदा आईएस कैदीहरू ठूलो चिन्ताको विषय बनेको उनीहरूले बताए । 

सयौं आईएस कैदीहरूलाई टर्की सीमानजिक कामचलाउ कारागारमा बन्दी बनाइएको अमेरिकी रक्षा अधिकारीहरू बताउँछन् ।

सीएनएनबाट
 

असोज २३, २०७६ मा प्रकाशित

प्रतिक्रिया दिनुहोस