काठमाडौं– प्रधानमन्त्री केपी शर्मा ओलीले नेपालको राष्ट्रिय हितलाई केन्द्रित गरेर चीनसँग साझेदारी र सहमति गर्ने बताएका छन् ।

चीन र नेपालबीच लामो समयदेखि रही आएको असल, प्रगाढ र मैत्रीपूर्ण छिमेक सम्बन्धलाई यो भ्रमणले नयाँ उचाइमा पुर्‍याउने उनको विश्वास छ ।

चिनियाँ राष्ट्रपतिको भ्रमणका सम्बन्धमा बिहीवार पूर्वप्रधानमन्त्री, पूर्वपरराष्ट्रमन्त्री, पूर्वराजदूत र आर्थिक क्षेत्रका जानकारहरूसँगको छलफलका क्रममा ओलीले भ्रमण सफल गराउन सबैसँग सहयोगको आग्रह गरेका हुन् ।

प्रधानमन्त्री ओलीले नेपालको राष्ट्रिय हितलाई केन्द्रित गरेर चीनसँग साझेदारी र सहमति गर्ने प्रतिबद्धता जनाएको नेकपाका प्रवक्ता नारायणकाजी श्रेष्ठले जानकारी दिए । 

बैठकमा सबै पूर्वप्रधानमन्त्रीले चीनका राष्ट्रपतिबाट नेपालको भ्रमण हुनु ऐतिहासिक महत्त्वको कुरा रहेको भन्दै उच्च महत्त्व दिएर सफल बनाउने कुरामा सबैको एकमत रहेको प्रवक्ता श्रेष्ठले बताए । 

बैठकमा भ्रमणको तयारीबारे परराष्ट्रमन्त्री प्रदीप ज्ञवालीले जानकारी गराएका थिए ।

रेलको कुरा गरेर तत्कालीन कुरालाई ओझेल नपारौं

बैठकमा प्रमुख प्रतिपक्षी दल नेपाली कांग्रेसका सभापति शेरबहादुर देउवाले ऋण लिएर रेल्वे बनाउने कुरा नगर्न आग्रह गरेका थिए । देउवाको प्रस्ताव सम्बोधन गर्दै ओलीले अहिले प्रि–फिजिविलिटी स्टडी मात्र भएको र डीपीआर बन्नै बाँकी रहेकाले अहिले नै लगानीको बारेमा प्रश्न गर्नु जरुरी नरहेको बताए । 

‘प्रधानमन्त्रीले फिजिविलिटी स्टडी भएपछि मात्र डीपीआर बन्ने होला, लगानीको मोडालिटी बारेमा पनि थप छलफल हुन्छ भनेर भन्नुभयो,’ प्रवक्ता श्रेष्ठले भने, ‘तत्कालीन कुरालाई ओझेल पार्नेगरी रेलको कुरा नगरौं । रेलको एजेन्डा राष्ट्रको महत्त्वपूर्ण एजेण्डा हो, अहिले नै कार्यान्वयन गर्ने अन्य कुरा महत्त्वपूर्ण छ ।’ 

श्रेष्ठका अनुसार बैठकमा सहभागी सबैले नेपाल र चीनबीच कनेक्टिभिटी र सडक विस्तारमा जोड दिएका थिए ।

‘के–के सम्झौता गर्ने भन्नेबारे डिटेलमा प्रस्ताव तयार गर्ने काम परराष्ट्र मन्त्रालयको हो,’ उनले भने ।