काठमाडौँ - दुई दिनका लागि नेपालको राजकीय भ्रमणमा आउन लागेका चिनियाँ राष्ट्रपति शी चिनफिङ शनिवार अपरान्ह भारतको मामल्लापुरमबाट त्रिभुवन अन्तर्राष्ट्रिय विमानस्थलमा विशेष विमानमार्फत आउनेछन् ।

भारतीय प्रधानमन्त्री नरेन्द्र मोदीसँग अनौपचारिक भेटघाटका लागि शी शुक्रवार भारतको ऐतिहासिक शहर मामल्लापुरम पुगेका थिए । भारतीय सञ्चारमाध्यमहरूले शी-मोदीको अनौपचारिक भेटलाई विशेष महत्त्वका साथ प्रसारण गरेका छन् ।

मोदीसँग अनौपचारिक भेटघाट भएपछि शी र मोदी दुवैले भरतनाट्यम नृत्यको आनन्द लिएका थिए । भरतनाट्यम नृत्य दक्षिण भारतको प्रचलित नृत्य हो ।

शी-मोदीको भेटवार्ताका क्रममा भारतका विदेशमन्त्री एस जयशंकर र राष्ट्रिय सुरक्षा सल्लाहकार अजित डोभाल पनि सँगै थिए ।

शीलाई मोदीले युनेस्कोले विश्व सम्पदा सूचीमा सामेल गरेको १६ दशमलव ५ वर्गकिलोमिटर क्षेत्रफलमा फैलिएको प्राचिन र ऐतिहासिक क्षेत्रमा घुमाउन लिएर गएका थिए ।

उनीहरू दुवै पहिला अर्जुन तपस्यास्थली पुगे, त्यसपछि कृष्ण वाटरबल, अनि पंचरथ र अन्तिममा शोर टेम्पल पुगेका थिए । मोदी आफैले शीलाई ऐतिहासिक सम्पदाहरूको बारेमा बताएका थिए ।

दुवै नेताहरूबीचको यो दोस्रो अनौपचारिक भेटघाट हो । पहिलो अनौपचारिक भेटघाट भारतको वुहानमा भएको थियो ।