काठमाडौं – बाँदरहरूलाई धातुको सिक्रीले बाँधिएको छ अनि बिरालो र कुुकुरहरूलाई रगत चुहाएर राखिएको छ । 

यो भयावह दृश्य एकजना पशु अधिकार अभियन्ताले जर्मनीको विषपरीक्षण प्रयोगशालामा गोप्य रूपमा खिचेका हुन् । 

जर्मनीको पशु अधिकारवादी संगठन सोको टीएरशुजले क्रुएल्टी फ्री इन्टरनेसनलसँग मिलेर उक्त दुर्व्यवहारको पर्दाफास गरेको हो । जर्मनीको ह्याम्बर्गको बाहिरपट्टि रहेको एलपीटी ल्याबोरेटोरी अफ फार्माकोलोजी यान्ड टक्सिकोलोजोमा यो कुकृत्य गरिएको पाइएको हो । 

तस्वीरहरूमा बाँदरलाई पर्खालमा सिक्रीले बाँधिएको, कसैको टाउको बाँधिएको अनि केही भाग्न खोजेको र एक कुकुर साँघुरो कक्षमा बेस्सरी रगत चुहाइरहेको देखिन्छ । 

गोप्य अभियन्ताले सन् २०१८ को डिसेम्बर महिनादेखि सन् २०१९ को मार्च महिनासम्म उक्त अनुसन्धान स्थलमा जागिर खाएको र कुकुर, बाँदर, बिरालो र खरायोमाथि परीक्षण गरेको आफ्नै आँखाले देखेको बताए । उक्त परीक्षण विश्वभरिका कम्पनीका लागि गरिएको थियो । 

जनावरहरूलाई भयानक परिस्थितिमा राखिएको उनले बताए । 

कुकुरहरूको घोक्रोमा जबर्जस्ती पाइप पसाइएको थियो अनि क्याप्सुल खान दिइएको थियो । परीक्षणपछि उनीहरू पीडामा रहेको रगत चुहाएको देखिन्थ्यो । 

जनावरहरूलाई कामदारहरूले हिंसा गरेको उनले दाबी गरे । 

बिरालोहरूलाई तालिम नपाएकाहरूले दिनदिनै १३ वटा सुई दिने गरेको र पीडामा छटपटाउन बाध्य बनाएको बताइएको छ । 

पशु अधिकार अभियन्ताहरूले यसको जानकारी प्रहरीलाई दिएका छन् र प्रहरीले यसको अनुसन्धान गरिरहेको छ । 

जर्मनीमा पशुहरूमाथि परीक्षण गर्न नपाइने कडा कानून नभएको बताउँदै थप कडा कानून बनाउन उनीहरूले आग्रह गरेका छन् ।

एजेन्सी