प्रधानमन्त्रीको दोस्रो डायलासिस, ग्राण्डी पुगेका नेकपा नेताले भेट्न पाएनन् ओलीलाई

फाइल फोटो
कात्तिक १४, २०७६

काठमाडौं – नेपाल कम्युनिस्ट पार्टी (नेकपा) का नेता भीम रावलले प्रधानमन्त्री केपी शर्मा ओलीको दोस्रो डायलासिस भइरहेको बताएका छन् । 

प्रधानमन्त्री ओलीलाई भेट्न बिहीवार अपराह्न ग्राण्डी अस्पताल पुगेका रावलले ओली डायलासिसका क्रममा रहेको प्रतिक्रिया दिए ।


ADVERTISEMENT

‘उहाँलाई माथि लगेर डायलासिस गराइँदै रहेछ, यसकारण भेट्न पाइएन,’ सञ्चारकर्मीहरूसँगको कुराकानीमा रावलले भने, ‘आधा प्रक्रिया पूरा भइसकेको जानकारी मैले पाएँ । बाँकी आधा पूरा भइसकेपछि उहाँलाई तल आफ्नो क्याबिनमा ल्याइने छ अनि डाक्टरहरूले सल्लाह दिनुहुनेछ ।’

प्रधानमन्त्री ओलीलाई भेट्न नेकपा प्रवक्ता नारायणकाजी श्रेष्ठ समेत अस्पताल पुगेका थिए । उनले पनि ओलीलाई भेट्न पाएनन् ।

बुधवार नै प्रधानमन्त्री ओलीलाई भेट्न पुगेका उपप्रधानमन्त्री ईश्वर पोखरेलले प्रधानमन्त्री ओलीको स्वास्थ्यस्थिति सामान्य रहेको बताएका थिए ।

स्वास्थ्यमा अचानक समस्या आएपछि प्रधानमन्त्री ओलीलाई बुधवार बिहान १० बजे अस्पताल पुर्‍याइएको थियो । शुरूमा उनको स्वास्थ्य अवस्था सामान्य रहेको र नियमित फलोअपमा गएको बताइएपनि मृर्गाैलामा समस्या देखिएपछि अपराह्न मिर्गौलाको डायलासिस गरिएको थियो । 

प्रधानमन्त्री ओलीका प्रेस सल्लाहकार कुन्दन अर्यालले प्रधानमन्त्री ओलीको स्वास्थ्य बाहिर सञ्चारमाध्यममा आएजस्तो ‘क्रिटिकल’ नभएको बताए । 

बिहीवार बिहान लोकान्तरसँग कुरा गर्दै अर्यालले भने, ‘मैले भर्खर उहाँलाई भेटेर फर्कें । उहाँको स्वास्थ्यस्थिति सामान्य छ । उहाँ आजै बालुवाटार फर्कने तयारीमा रहनुभएको मैले बुझेको छु ।’

जनचासो रहेको प्रधानमन्त्री ओलीको स्वास्थ्यस्थितिका बारेमा अस्पताल, ओलीको मेडिकल टीम र सचिवालयबाट कुनै सूचना दिइएको छैन । 

बुधवार साँझ अस्पतालका मेडिकल निर्देशक डा. चक्रराज पाण्डे र ओलीका निजी चिकित्सक डा. दिव्या सिंह शाहले हस्ताक्षर गर्दै एक विज्ञप्ति जारी गरेका थिए । विज्ञप्तिमा पनि प्रधानमन्त्री ओलीको स्वास्थ्य परीक्षण बिहीवारसम्म सकिने र त्यसपछि डिस्चार्ज हुने उल्लेख थियो ।

 

कात्तिक १४, २०७६ मा प्रकाशित

प्रतिक्रिया दिनुहोस