काठमाडौं – भारतको महाराष्ट्रमा शिवसेना र भारतीय जनता पार्टीबीच मुख्यमन्त्री पदको लागि विवाद चर्किएपछि ब्रेकअप भएको छ । 

यिनीहरूबीच ३० वर्षदेखिको गठबन्धन तोडिएको छ । भाजपाको सरकार बनाउन सहयोग नगर्ने निर्णय लिँदै शिवसेना आफैं सत्ताको समीकरण बनाइरहेको छ । शिवुेना प्रमुख उद्धव ठाकरेले कांग्रेस र एनसीपीसँग मिलेर सरकार बनाउने प्रयास थालेका छन् । 

भाजपाले महाराष्ट्रमा सत्ता चलाउने बाटो बन्द भएको देखिएको छ । तर अहिलेको घटनाक्रमले भविष्यमा भाजपालाई फाइदा पनि गराउन सक्ने देखिएको छ । 

महाराष्ट्रमा १५ दिनअघि विधानसभा चुनावको परिणाम सार्वजनिक भएपछि भाजपा र शिवसेना मिलेर बहुमत ल्याएका थिए । तर मुख्यमन्त्री पदमा शिवसेना अडिएपछि भाजपाले सरकार नबनाउने निर्णय लियो र शिवसेनालाई सरकार गठनको मौका दियो । 

शिवसेनाले कांग्रेस र एनसीपीसँग मिलेर सरकार बनाउन लागेको भए पनि सरकार लामो समय टिक्न गाह्रो देखिन्छ किनकि विचारधाराको स्तरमा यिनीहरू घोर विरोधी हुन् । 

केन्द्रमा नरेन्द्र मोदी सत्तामा आएपछि भाजपाको ग्राफ भारतमा बढेको छ । धेरै राज्यमा भाजपाले आफ्नै बलबुतामा सरकार बनाएको छ । उत्तर प्रदेशपछि महाराष्ट्र भारतको ठूलो राज्य हो र भाजपा यसलाई गुमाउन चाहँदैन । सन् २०१४ अघिसम्म महाराष्ट्रमा शिवसेना दाइ र भाजपा भाइको भूमिकामा थिए । त्यसै वर्षको विधानसभा चुनावमा भाजपा बलियो भएर सरकार बनायो र आफ्नो शक्ति चिन्न थाल्यो ।

महाराष्ट्रमा शिवसेना उग्र हिन्दूत्व, मुसलमानविरोध र पाकिस्तानमाथिको आक्रामक विचारधाराका अघि बढिरहेको छ । तर भाजपा उसभन्दा उग्र दृष्टिकोण लिएर नरेन्द्र मोदी तथा अमित शाह जस्ता नेताहरूलाई अघि लगाएर शिवसेनाका लागि लक्ष्मणरेखा कोर्न सफल छ । महाराष्ट्रमा बालासाहेक ठाकरेको पालाको प्रभाव छैन । त्यसैले सन् २०१९ को विधानसभा चुनावमा भाजपाले १६४ र शिवसेनाले १२४ सीटमा लडेका हुन् । 

भाजपाले महाराष्ट्रको सत्ता एक्लैले चलाउनका लागि शिवसेनालाई पछि पार्नैपर्ने थियो । यस्तो अवस्थामा शिवसेना मुख्यमन्त्रीको कुर्सीका लागि भाजपालाई छोडेर कांग्रेस र एनसीपीसँग मिल्न गइरहेको छ । भाजपालाई शिवसेनाको साथ छोड्ने अवसर अहिले आएर प्राप्त भएको छ यसमा ऊ भित्रभित्रै खुशी छ । 

कांग्रेस र एनसीपीसँग हात मिलाएपछि शिवसेनाले उग्र हिन्दूत्वको राजनीति र मुसलमानविरोधी विचारधारासँग सम्झौता गर्नुपर्ने हुन्छ । महाराष्ट्रमा हिन्दूत्वको प्रतिनिधित्व गर्ने दल अब भाजपा मात्र हुनेछ ।

भाजपाका लागि महाराष्ट्रमा मैदान पूरै खुला हुनेछ । अब भाजपा विरुद्ध अन्य दलको चुनावी लडाईं हुनेछ । भाजपाले मोदी र शाहको नेतृत्वमा एक्लै २८८ सीटमा चुनाव लडेर थप राम्रो परिणाम ल्याउने अपेक्षा गरेको छ । शिवसेनाले चाहिँ कंग्रेस र एनसीपीसँग मिलेर सरकार बनाएर राजनीतिक रणभूमिमा आफूलाई कमजोर बनाएको छ । 

एजेन्सी