सुर्खेत - कर्णाली प्रदेशका मुख्यमन्त्री महेन्द्रबहादुर शाहीले कर्णालीको समृद्धिका लागि आलोचना नभई सुझाव चाहिएको बताएका छन् ।

सोमबार वीरेन्द्रनगरमा आयोजित पत्रकारहरुको न्यूनतम पारिश्रमिक बारेको कार्यक्रमलाई सम्बोधन गर्दै मुख्यमन्त्री शाहीले एम्बुस थापेर बसे देश नबन्ने बताए ।

‘तिललाई पहाड बनाउने परम्परा बसिसकेको छ । कहाँ कहिले के गल्ती गर्लान र आलोचना गरौंला भनेर पर्खिने बानी परेको छ,’ उनले भने, ‘यो समय सुझाव दिने हो । अझ म भन्छु, कर्णालीलाई सुन्दर बनाउन अहिले अरु केही होइन सपना देख्नुहोस र हामीलाई सुनाउनुहोस । अनिमात्र विकास गर्न सकिन्छ । आवश्यक नीति तथा कार्यक्रम बनाउन सकिन्छ ।’

उनले विगतमा कर्णाली धनी रहेको बताउँदै अहिले भने कर्णाली माग्ने प्रदेशको रुपमा गइसकेको बताए । ‘हामी सबैको घरमा चाँदी, सुन पर्याप्त छ,’ उनले भने, ‘उहिले हाम्रा पुर्खा चीनसँग व्यापार गर्ने गरेका थिए । तर अहिले अवस्था फेरिएको छ । सबै माग्ने बनेका छन् । अरुको सहकारमा बाँच्ने कुरा सिकाइएको छ ।’

यति मात्र होइन, आफू असफल भएको भन्दा पनि अर्को व्यक्ति पास भएकोमा रीस गर्ने बानी बसिसकेको उनको भनाइ थियो ।

मुख्यमन्त्री शाहीले प्रदेश सरकार दुइ वर्षको मात्रै भएको र दुइ वर्षमै बोल्न वा दौडन सक्ने अवस्था नहुने बताए । विदेशी राज्यहरुसँग यहाँको तुलना गर्न नहुने बताउँदै प्रदेश सरकार कानून निर्माणमा लागिरहेको उनको भनाई थियो ।

‘अहिले हामीले कानून निर्माणलाई तीव्रता दिइरहेका छौं,’ उनको दाबी छ, ‘केहि कानूनहरु परिमार्जन गर्ने तयारीमा लागिरहेका छौं । त्यसका लागि सबै पक्षको सकारात्मक साथ सहयोग आवश्यक पर्दछ ।’

उनले काम गर्दा समस्या आउने बताउँदै प्रदेश सरकार ती आएका समस्याको हल खोज्दै अघि बढिरहेको दाबी गरे ।

मुलुकमा आएको संघीयतामाथि नै केही शक्तिले प्रहार गरिरहेको बताउँदै मुख्यमन्त्री शाहीले उनीहरुको सपना पुरा नहुने बताए ।

‘हिजो गणतन्त्र नचाहने, संघीयता नचाहने तत्व धेरै थिए,’ शाही भन्छन्, ‘ती तत्वहरु अहिले नचाहेर भएपनि संघीयता स्वीकार गर्न बाध्य भएका छन् । यो व्यवस्थाको विकल्प नै छैन । बरु संविधानमा कहि कतै असन्तुष्टि भए वा कुनै काम गर्न बाधा आए समाधान गर्न सकिन्छ ।’

उनले भ्रष्टाचार नियन्त्रण गर्न आवश्यक रहेको बताए ।