काठमाडौं – तिब्बतको मामिलामा हस्तक्षेप गर्न संयुक्त राष्ट्रसंघलाई अमेरिकाले उपयोग गरिरहेको चीनले आरोप लगाएको छ । 

चीनले दलाई लामाको उत्तराधिकारी छान्न गरेको कोशिशलाई रोक्न अमेरिकाले प्रयास गरिरहेको बेलामा चीनको यो आरोप सार्वजनिक भएको हो । 

अघिल्लो साता अमेरिकाको अन्तर्राष्ट्रिय धार्मिक स्वतन्त्रता राजदूत साम ब्राउनब्याकले समाचार संस्था एएफपीलाई दलाई लामाको उत्तराधिकारीको विषय राष्ट्रसंघले हेरोस् भन्ने चाहना वाशिङटनको रहेको बताएका थिए । उत्तराधिकारी छनोट तिब्बती बौद्धहरूले गर्ने कुरा हो र चीन सरकारले यसमा हस्तक्षेप गर्न नमिल्ने उनको भनाइ थियो । 

ब्राउनब्याकको भनाइमा कडा प्रतिक्रिया दिँदै चीनले अमेरिकालाई धार्मिक स्वतन्त्रताको नाममा आन्तरिक मामिलामा हस्तक्षेप नगर्न चेतावनी दिएको छ । 

चिनियाँ विदेश मन्त्रालयका अधिकारी गेंग शुआङले सोमवार आयोजित नियमित पत्रकार सम्मेलनका क्रममा अमेरिकाको प्रयास विफल हुने बताए । 

हिमालय क्षेत्रमा आफूले विकास र आधुनिकीकरण गरिरहेको चीनको तर्क छ । 

चीनको समर्थन गर्ने व्यक्तिलाई दलाई लामाको उत्तराधिकारी बनाउने चीनको तयारी छ । सन् १९९५ मा चीनले ५ वर्षको बालकलाई नियन्त्रणमा लिएको थियो । उक्त घटनामा नियन्त्रणमा परेका बालकलाई विश्व समुदायले सबभन्दा सानो उमेरको राजनीतिक बन्दी संज्ञा दिएको थियो । तिनै बालकलाई दलाई लामाको उत्तराधिकारी बनाउने चीनको योजना रहेको बताइन्छ ।

आफूअनुकूलको नयाँ दलाई लामा आएपछि तिब्बतको स्वायत्तता संघर्ष अन्त्य हुने अपेक्षा चीनले लिएको छ । 

दलाई लामा ८४ वर्षका भइसकेका छन् र उनको स्वास्थ्य कमजोर बन्दै गएको छ । दलाई लामाले आफ्नो उत्तराधिकारी आफैं छान्न चाहेको बताएका छन् ।

एजेन्सी