काठमाडौं – चीनको हार्बिन शहरमा बस्ने झाङ बिनशेङको नाकमा विगत २० वर्षदेखि दाँत आएको पत्ता लागेपछि चिकित्सकहरूले शल्यक्रिया गरेर हटाएका छन् । 

तीन महिनादेखि नाक बन्द भएर समस्यामा परेपछि अघिल्लो साता उनी अस्पताल पुगेका थिए । 

नाकलाई त उनकै दाँतले बन्द गरेको थाहा पाएपछि उनी स्तब्ध भए । उनी १० वर्षको हुँदा एक दुर्घटना भएपछि दाँत खुस्केको थियो र त्यो नाकमा गएर अड्किएको रहेछ ।

नाकभित्र यसरी दाँत आउनुलाई इन्ट्रानेजल रिटेन्ड टूथ भनिन्छ । शारीरिक क्षति वा उमेर बढ्दा हुने समस्याले यो स्थिति ल्याउँछ । 

नाकको पोरामा दाँत आउने दुर्लभ अवस्था हो र यसले कुल जनसंख्याको ०.१ प्रतिशतलाई सताउँछ । नाकमा दाँत भएको लामो समयसम्म थाहै पाइँदैन । 

यो दुर्लभ मेडिकल केसको रिपोर्ट चिकित्सकहरूले हार्बिन मेडिकल विश्वविद्यालयको फोर्थ एफिलिएटेड हस्पिटलमा रिपोर्ट गरेका थिए । 

झाङ सन् १९९९ मा एक मलको तेस्रो तल्लाबाट लड्दा दुईवटा दाँत खुस्केको थियो । 

दुर्घटनापछि उनले एउटा दाँत मात्र फेला पारेका थिए । 

झाङ दुर्घटनामा गम्भीर घाइते बनेका थिए र अनुहारमा ६० भन्दा बढी टाँका लगाइएको थियो । तर त्यतिखेर उनले नाकमा अप्ठ्यारो परेको बताएका थिएनन् । 

तर तीन महिनाअघि उनको नाक बन्द भयो । उनले सास फेर्न गाह्रो भएको र राति राम्ररी सुत्न नसकेको बताए । नाकमा केही कुरा कुहिएको जस्तो गन्ध आउने गरेको बताए । 

एजेन्सी