जिल्लाको पर्यटकीयस्थल बुलबुले तालमा चालु आर्थिक वर्षमा घुम्न आउने पर्यटकको संख्या बढेको छ ।

गत साउनयता मात्र ७० हजारभन्दा बढी आन्तरिक तथा बाह्य पर्यटक घुम्न आइसकेकामा करीब २ सय विदेशी पर्यटक पुगेका छन् ।

पछिल्लो समय ताललाई सफा र थप आकर्षित बनाइएकाले तालमा आउने पर्यटकको संख्यामा वृद्धि भएको हो । 

दशैंं र तिहारजस्ता चाडपर्वका बेला तालमा घुम्न आउनाका साथै पिकनिकका लागि पनि पर्यटक  आउने गर्दछन् । चाडपर्व सकिएसँगै पिकनिकस्थलको रुपमा यो क्षेत्र भीड लाग्ने गरेको सुर्खेत उपत्यका नगर विकास समितिले जनाएको छ ।

आन्तरिक तथा बाह्य पर्यटकलाई आकर्षित गर्न यहाँ बुलबुले उद्यान पुनःनिर्माण गरिनाका साथै तालमा डुंगा पनि सञ्चालन गरिएको छ । 

दशैंतिहारपछि बुलबुले ताल घुम्न आउनेको संख्यामा ह्वात्तै बढेको उक्त समितिका कर्मचारी निर्मला बास्तोलाले बताए । मुगुको रारा ताल घुम्न आउने पर्यटक बुलबुलेमा पनि घुमेरै जाने भएकाले यहाँ आउने पर्यटकको संख्या बढ्ने गरेको उनको भनाइ थियो ।

बुलबुलेमा यतिबेला दैनिक ३ हजारसम्म आन्तरिक तथा बाह्य पर्यटक घुम्न आउने गरेका छन् । बर्दियादेखि पिकनिक आएका कृष्ण रोकायले आफूलाई बुलबुले राम्रो लागेको बताए । बाँकेबाट घुम्न आएका सरिता मगरले पहिलेको भन्दा केही परिवर्तन भएको बताउँदै अझै यसलाई व्यवस्थित बनाउन सके बाह्य पर्यटकको आकर्षण बढ्ने जानकारी दिए ।

पर्यटकको संख्या वृद्धि भएसँगै त्यहाँको आम्दानीसमेत बढ्न थालेको  छ ।  गत वर्ष २ लाख ४७ हजार पर्यटक आउँदा ५ लाख रुपैयाँ आम्दानी भएको समितिका लेखापाल खड्ग रानाले जानकारी दिए ।

सवारीसाधन पार्किङस्थल, पिकनिक स्पट, ‘फिलिम सुटिङ’, खानेपानीको व्यवस्था, डुंगामा सयरजस्ता सुविधाका कारण बुलबुले तालबाट आम्दानी हुन थालेको र सो आम्दानी बुलबुलेको संरक्षण, विकास, र व्यवस्थापनमा खर्च हुने उनले बताए ।